Qytaıda energııa júıesine túsetin júkteme aptap ystyq saldarynan rekord jańartty
ASTANA. KAZINFORM — Qytaıdyń keń aýmaǵyn sharpyǵan aptap ystyq elektr energııasyna degen suranystyń buryn-sońdy bolmaǵan ósýine alyp keldi. Birqatar aımaqta aýa temperatýrasy 40 gradýs Tselsııge deıin jetti, dep habarlaıdy Reuters.
Bıyl alǵash ret Qytaıda táýliktik energııa júktemesi 1,5 mlrd kVt-tan asty. QHR Ulttyq energetıka basqarmasynyń málimetinshe, bul shilde aıyndaǵy tutynýdyń úshinshi rekordtyq kórsetkishi. Jańa shekteý ótken jylǵy kórsetkishten 55 mln kVt-qa artyq boldy.
Qytaıdyń ulttyq meteoqyzmeti habarlaǵandaı, sońǵy kúnderi eldiń soltústik-batys jáne ońtústik-batysyndaǵy segiz meteostantsııada sýbtropıkalyq antıtsıklon áserinen absolıýtti temperatýralyq rekordtar tirkelgen. Jaz bastalǵaly beri QHR provıntsııalarynda 36 ret aımaqtyq temperatýralyq shekter buzylǵan.
Ekstremaldy aýa raıy jaǵdaılary energııa júıesine túsetin júktemeniń negizgi faktory bolyp otyr. Ystyq Chýntsınnen teńiz jaǵalaýyndaǵy Gýanchjoýǵa deıingi aýmaqty qamtyp, 200 mıllıonnan astam halqy bar óńirlerge áser etti.
— Qazirgi tańda energııa júıesi júktemege tótep berip otyr. Alaıda naqty synaq kezeńi áli alda, elektr qýatyn shekteý qaýpi saqtalyp tur, — dedi energetıka jáne klımattyń ózgerýi jónindegi Economist Intelligence Unit aǵa sarapshysy Chım Lı.
Aptap tek egindi kúıdirip, aýyl sharýashylyǵy óndirýshileriniń tabysyn azaıtyp qana qoımaı, ónerkásip ortalyqtary men porttardyń jumysyn baıaýlatyp, densaýlyq saqtaý júıesine de aýyrtpalyq túsirýi múmkin.
Sonymen qatar, aptap ystyq tutynýshylyq suranystyń ósýine de sebep bolyp otyr. Qytaılyq ınternet-gıgant JD.com málimetinshe, shilde aıynda aýa baptaǵyshtar men qol jeldetkishteriniń satylymy ótken aımen salystyrǵanda tıisinshe 112% jáne 103%-ǵa artqan. Tamaqtaný oryndaryna da suranys ósken, sebebi turǵyndar ystyqtan qorǵaný joldaryn izdeýde.
Aıta ketelik Ispanııada aptap ystyq sońǵy eki aıda 1180 adamnyń ómirin jalmady.