Qytaıda eń iri aınalmaly elektr jetkizý jelisi salyndy

ASTANA. KAZINFORM — Jeksenbi kúni Qytaıda eldegi eń iri shól – Tarym oıpatynyń aınalasynda uzyndyǵy 4 197 shaqyrym bolatyn asa joǵary kerneýli aınalmaly elektr jetkizý jelisiniń qurylysy aıaqtaldy, dep habarlaıdy Sınhýa.

Bul joba Sıntszıan-Uıǵyr avtonomııalyq aýdanynyń ońtústigindegi ınfraqurylymdy damytýdaǵy mańyzdy kezeń bolyp sanalady.

750 kV kerneýde jumys isteıtin bul jeli eldegi osy sıpattaǵy eń aýqymdy jobalardyń biri bolyp otyr. Ol toǵyz qosalqy stantsııa men 10 myńǵa jýyq bolat tirekten turady. Jobany júzege asyrǵan – Qytaıdyń ulttyq State Grid elektr jelileri korporatsııasynyń quramyna kiretin Sıntszıan bólimshesi.

Atalǵan jeliniń qurylysy 15 jylǵa sozylǵan. Kompanııanyń málimetinshe, ony 2025 jyldyń qarasha aıynda tolyqtaı iske qosý josparlanyp otyr.

Tarym oıpatynda álemdegi ekinshi iri jyljymaly qumdy shól – Takla-Makan shóli ornalasqan. Ǵasyrlar boıy bul óńirde qumdy daýyldar oazısterge qaýip tóndirip, aımaqtyń damýyna kedergi keltirip kelgen.

Resmı tulǵalar men sarapshylardyń pikirinshe, bul joba Sıntszıannyń ońtústik bóligin damytýǵa serpin berip, búkil el boıynsha jańa energııa kózderin qamtamasyz ete alady.

Elektr jelisi qumdy shólden bastap Kýnlýn taýlaryna deıingi alýan túrli landshafty boılaı ótedi.

Jobanyń jetekshisi Lı Tszıýnniń aıtýynsha, qurylys materıaldaryn tasymaldaý úshin 50 metrlik qum tóbelerin kesip ótetin joldar salynǵan. Al taýly aımaqtarda bolat tirekterdiń shamamen 3 000 tonna komponentin jetkizý úshin arqan joldary paıdalanylǵan.

Qorshaǵan ortaǵa, ásirese jergilikti shól ósimdikterine áserin azaıtý maqsatynda ınjenerler tirekterdiń bıiktigin ózgertip, marshrýtqa túzetýler engizgen. Sonymen qatar, 480 myń sharshy metrden astam aýmaqqa shóppen toqylǵan arqan torlar arqyly qum bógetterin tóseý josparlanyp otyr. Bul – Qytaıda qum kóshkinin toqtatý úshin keńinen qoldanylatyn ádis, dep túsindirdi Lı Tszıýn.

Budan buryn Qytaıdaǵy eń iri teńiz gaz ken ornynyń ekinshi kezeńi paıdalanýǵa berilgenin jazǵan edik.