Qytaıda elektromobılderge arnalǵan qýattaý qurylǵylarynyń sany 21 mln-nan asty
ASTANA. KAZINFORM — Qytaıda elektromobılderge arnalǵan qýattaý ınfraqurylymy qarqyndy túrde damyp jatyr, dep habarlaıdy Sınhýa.
Bıylǵy jyldyń aqpan aıynyń sońyna qaraı eldegi qýattaý qurylǵylarynyń jalpy sany 21,01 mln birlikke jetip, ótken jylmen salystyrǵanda 47,8 paıyzǵa artty. Bul týraly Qytaıdyń Memlekettik energetıka isteri jónindegi basqarmasy jarııalady.
Onyń ishinde 4,834 mln qurylǵy jalpyǵa ortaq paıdalanýǵa arnalǵan, bul kórsetkish bir jyl ishinde 28,8 paıyzǵa ósken.
Al jeke paıdalanýǵa arnalǵan qýattaý qurylǵylarynyń sany ótken aıdyń sońynda 16,176 mln bolyp, jyldyq ósim 54,6 paıyz boldy. Bul eldi mekenderde mundaı qurylǵylarǵa suranystyń aıtarlyqtaı artqanyn kórsetedi.
Ulttyq qýattaý ınfraqurylymyn monıtorıngteý jáne qyzmet kórsetý platformasynda jarııalanǵan derekter Qytaıda elektromobılderge arnalǵan qoldaý jelisiniń keńeıýi jalǵasyp jatqanyn aıqyndaıdy. Bul, óz kezeginde, elektromobılder satylymynyń kúrt ósýimen baılanysty.
Qytaı avtomobıl óndirýshiler qaýymdastyǵynyń málimetinshe, 2025 jyly jańa energııa kózderindegi kólik quraldarynyń óndirisi men satylymy aıtarlyqtaı ósti. Atap aıtqanda, óndiris kólemi 16,626 mln, al satylym 16,49 mln birlikti qurap, tıisinshe 29 paıyzǵa jáne 28,2 paıyzǵa artqan.
2025 jyldyń qazan aıynda Qytaı eldegi elektromobılderge arnalǵan qýattaý ınfraqurylymyn damytýǵa baǵyttalǵan úsh jyldyq is-qımyl josparyn jarııalady. Qujatqa sáıkes, 2027 jyldyń sońyna qaraı elde jalpy sany 28 mln qýattaý qurylǵysynan turatyn, jalpy qýaty 300 mln kVt-tan asatyn ulttyq jeli qurý kózdelip otyr.
Aıta ketelik EO-nyń Qytaıdan kólik ımporty alǵash ret eksporttan kóp bolǵan edi.
