Qytaıda elektromobılderge arnalǵan qýattaý kolonkalarynyń sany qarqyndy ósip keledi

ASTANA. KAZINFORM - Qytaıda elektromobılderge arnalǵan zarıadtaý qurylǵylarynyń sany jyl saıyn aıtarlyqtaı artyp keledi. Bul týraly Sınhýa resmı derekterge silteme jasap habarlady.

Bıyl qarasha aıynyń sońyndaǵy jaǵdaı boıynsha elde ornatylǵan qýattaý qurylǵylarynyń jalpy sany 19,32 mln birlikten asty. Bul kórsetkish ótken jylmen salystyrǵanda 52 paıyzǵa joǵary. 

QHR Memlekettik energetıka basqarmasynyń málimetinshe, qoǵamdyq paıdalanýǵa arnalǵan qýattaý kolonkalarynyń sany bir jyl ishinde 36 paıyzǵa ósip, 4,63 mln birlikke jetken. Al jeke menshik qýattaý qurylǵylary 57,8 paıyzǵa artyp, 14,7 mln birlikti qurady.

Sonymen qatar qarasha aıynyń sońyna qaraı qoǵamdyq qýattaý qurylǵylarynyń jıyntyq nomınal qýaty 210 mln kılovatqa jetkeni belgili boldy.

Aıta keteıik, Qytaı úkimeti bıyl qazan aıynda elektromobılderge arnalǵan qýattaý ınfraqurylymyn damytý jónindegi úsh jyldyq is-qımyl josparyn jarııalaǵan bolatyn. Qujatqa sáıkes, 2027 jyldyń sońyna deıin jalpy qýaty 300 mln kılovattan asatyn, el aýmaǵyn qamtıtyn 28 mln qýattaý qurylǵysynan turatyn ulttyq jeli qalyptastyrý kózdelip otyr.

Qytaılyq júrgizýshisiz taksıler Eýropada alǵash ret Londonda synalady.