Qytaıda alǵash ret ǵaryshkerlerge arnalǵan úńgirdegi jattyǵýlar aıaqtaldy
ASTANA. KAZINFORM – 28 qytaılyq ǵaryshkerden quralǵan top el tarıhynda alǵash ret úńgir jaǵdaıynda ótken daıyndyq baǵdarlamasyn sátti aıaqtady. Bul jattyǵýlar uzaq merzimdi orbıtalyq ushýlar men bolashaq Aıǵa baǵyttalǵan pılottalatyn mıssııalar aldynda tirshilik etý daǵdylary men psıhologııalyq tózimdilikti shyńdaýǵa baǵyttalǵan. Bul týraly China Daily basylymy jazdy.
Habarlanǵandaı, jattyǵýlardy Chýntsın mýnıtsıpalıtetiniń Ýlýn aýdanyndaǵy Qytaı ǵaryshkerlerin daıarlaý ortalyǵy uıymdastyrǵan jáne olar shamamen bir aıǵa sozylǵan.
Tórt topqa bólingen qatysýshylar Tselsıı boıynsha ortasha temperatýrasy shamamen 8 gradýs jáne ylǵaldylyǵy 99%-ǵa jetetin tabıǵı úńgir ortasynda alty kún, bes tún ótkizdi.
Baǵdarlama onnan astam mamandandyrylǵan baǵytty qamtydy. Ǵaryshkerler qorshaǵan ortany baqylap, úńgir júıelerin kartaǵa túsirip, kórinýdiń shekteýli jaǵdaıynda jerdegi basqarý organdarymen baılanys ornatty. Qarańǵylyq pen sensorlyq oqshaýlaný stresin jeńýge baǵyttalǵan psıhologııalyq jáne minez-qulyqtyq jattyǵýlarǵa bólek blok arnaldy.
Kýrs barysynda ekıpajdar ǵylymı tapsyrmalardy oryndap, jabyq keńistikte tirshilikti qamtamasyz etý resýrstaryn tıimdi basqarýdy úırendi. Jattyǵýlardyń praktıkalyq bóligi sýyq jáne ylǵaldy ortada tar týnnelder men tik jartastarda júrý úshin joǵary deńgeıdegi fızıkalyq tózimdilikti talap etti.
Bul joba halyqaralyq tájirıbeniń jalǵasy jáne damýy boldy. 2016 jyly qytaılyq ǵaryshker E Gýanfý Italııada Eýropalyq ǵarysh agenttiginiń osyndaı oqý-jattyǵýlaryna qatysqan, alaıda qazir Qytaı óziniń daıarlyq júıesin engizdi.
Ortalyq mundaı qarqyndy baǵdarlamalardy turaqty túrde ótkizý nıeti týraly málimdedi. Jaqyn arada ǵarysh baǵdarlamasynyń tájirıbeli qatysýshylary da, jańadan kelgender de oqýdan ótedi. Bul ekıpajdardyń ekstremaldy faktorlarǵa beıimdelýin júıeli túrde jaqsartýǵa jáne bolashaqta basqarylatyn planetaaralyq mıssııalardyń senimdiligin arttyrýǵa múmkindik beredi.
Buǵan deıin ǵaryshta uzaq ýaqyt qalyp qoıǵan taıkonavtar Jerge oralǵanyn jazdyq.