Qytaıda eks-sheneýnik para alǵany úshin ólim jazasyna kesildi
ASTANA.KAZINFORM - Tszıansı provıntsııasynyń Nanchan qalasyndaǵy sot Shanhaı partııasynyń turaqty komıtetiniń burynǵy múshesi Chjý Chjısondy asa iri kólemde para alǵany úshin eki jylǵa keıinge qaldyrýmen ólim jazasyna kesti, dep habarlaıdy Sınhýa.
Tergeý barysynda aıyptalýshy 2003 jyldan 2024 jylǵa deıin qyzmettik jaǵdaıyn jeke paıdasy úshin paıdalanǵany anyqtaldy. Partııalyq jáne memlekettik laýazymdardy atqara otyryp, uıymdar men jeke tulǵalarǵa bıznes júrgizýge, qurylys kelisimsharttaryn, nesıeler men qarjylandyrý alýǵa kómektesken.
Zańsyz áreketteri úshin sheneýnik jeke ózi nemese deldaldar arqyly qolma-qol aqsha men múlik alǵan. Paranyń jalpy somasy 139 mıllıon ıýannan asty, bul 19,46 mıllıon dollarǵa teń.
Sot Chjý Chjısondy eki jylǵa keıinge qaldyrýmen, saıası quqyqtarynan ómir boıy aıyrýmen jáne barlyq jeke múlkin tárkileýmen ólim jazasyna kesti. Tárkilengen barlyq sybaılas jemqorlyq qarajaty memleketke aýdaryldy.
Eki jylǵa keıinge qaldyrý jeńildetetin mán-jaılarǵa baılanysty berildi. Sottalýshy kinásin tolyq moıyndady, ókinish bildirdi jáne buryn belgisiz bolǵan sybaılas jemqorlyq isterin erikti túrde ashty. Burynǵy sheneýniktiń belsendi yntymaqtastyǵy zańsyz jolmen alynǵan múliktiń kóp bóligin tárkileýge múmkindik berdi.
Qytaıdyń zań tájirıbesinde, eger sottalǵan adam eki jyldyq synaq merzimi ishinde jańa qylmys jasamasa, shartty túrde ólim jazasy ádette ómir boıyna bas bostandyǵynan aıyrýmen aýystyrylady. Bul jaza bolashaqta úlgili minez-qulyǵyna baılanysty qysqartylýy múmkin.
Buǵan deıin Qytaıda sybaılas jemqorlyq úshin taǵy bir ólim jazasy taǵaıyndalǵany habarlanǵan bolatyn.
