Qytaıda eki balany óltirgen erli-zaıypty ólim jazasyna kesildi

ASTANA. KAZINFORM – Qytaıda birinshi nekedegi balalaryn óltirdi dep tanylǵan er adam men onyń kóńil qosqan qyzy ólim jazasyna kesildi. Olar eki kishkentaı balany turǵyn úıdiń terezesinen laqtyryp jibergen, dep habarlaıdy VVS. 

Balalardyń ákesi Chjan Bo men onyń súıiktisi E Chenchen 2020 jyly eki jasar qyz ben bir jasar uldy óltirgeni úshin kináli dep tanyldy. Jup sársenbi kúni Chýntsın qalasynda ólim jazasyna kesildi.

Olarǵa ólim jazasy naqty qalaı oryndalǵany belgisiz, biraq Qytaıda ólim jazasy kóbine ólimge ákeletin ınektsııa nemese atý arqyly júzege asyrylady.

Sot Chjannyń E-ge óziniń otbasylyq jaǵdaıyn aıtpastan onymen «orynsyz» qarym-qatynasta bolǵanyn aıtty. Alaıda shyndyqty bilgennen keıin E onymen kezdesýdi jalǵastyrdy.

Chjan 2020 jyldyń aqpanynda áıelimen ajyrasty. Alaıda súıiktisi onyń eki balasyn «nekege turýyna kedergi jáne bolashaq birge ómir súrýine aýyrtpalyq» dep sanady.

Boıjetken Chjandy qos sábıdi óltirýge talaı ıtermelegen. Qaskúnem jup balalardyń terezeden qulaýyn jazataıym oqıǵa retinde uıymdastyrýdy kelisken. 2020 jyldyń 2 qarashasynda Chjan balalaryn 15-shi qabattaǵy páteriniń terezesinen laqtyryp jiberdi.

Bul jańalyq eldegi tańdaýly ýnıversıtettiń stýdenti bolǵan Ý Seıý ólim jazasyna kesilgen kúni tarady. Jas jigit 2015 jyly anasyn gantelmen uryp óltirgeni úshin kináli dep tanylǵan.