Qytaıda drondarǵa qarsy lazerlik keshender tanystyryldy
ASTANA. KAZINFORM – Qytaı astanasynda ótken qorǵanys aqparattyq tehnologııalary men jabdyqtary kórmesinde ushqyshsyz ushý apparattaryn joıýǵa arnalǵan joǵary energetıkalyq Lijian («Ótkir qylysh») lazerlik keshenderiniń jańa serııasy tanystyryldydep habarlaıdy agenttik tilshisi.
Júıelerdi qytaılyq Harbin Xinguang Optic-Electronics Technology kompanııasy ázirlegen.
Keshenderdiń basty ereksheligi — joǵary mobıldiligi. Portatıvti nusqalaryn bir-eki áskerı qyzmetshi ońaı tasymaldap, qysqa ýaqyt ishinde iske qosa alady.
Taktıkalyq mindetterine qaraı júıeler kólemi men áreket etý qashyqtyǵy boıynsha birneshe túrge bólinedi. Statsıonarlyq Lijian-10G modeliniń nysanany joıý radıýsy 1200 metrge deıin jetedi. Al salmaǵy 30 keli bolatyn Lijian II jáne 25 kelilik Lijian III tasymaldy nusqalary 500 metrge deıingi qashyqtyqtaǵy drondardy tıimdi joıa alady.
Óndirýshi málimetinshe, Lijian III áýe nysanasynyń korpýsyn nebári 4 sekýnd ishinde tesip óte alady. Kelesi atýǵa daıyndalý úshin lazer sáýle shyǵarǵyshyn salqyndatýǵa 5 sekýndtan az ýaqyt qajet. Qurylǵynyń energııa tutynýy shamamen 2 kılovattty quraıdy, al bir portatıvti qondyrǵynyń naryqtyq baǵasy 295 myń AQSh dollaryna baǵalanǵan.
Nysanalardy anyqtaý jáne joıý úshin Lijian keshenderi jasandy ıntellekt tehnologııalaryn paıdalana alady. Ázirleýshilerdiń aıtýynsha, lazerlik qondyrǵylardy áýe shabýylyna qarsy qorǵanystyń biryńǵaı júıesine biriktirýge, syrtqy nysanalaý ınterfeısterine qosýǵa jáne shaǵyn kólemdi radarlarmen jabdyqtaýǵa múmkindik bar.
Buǵan deıin Jambyl oblysy aýmaǵynda 120 áskerı mindetti azamattyń ushqyshsyz ushý apparattarynyń operatorlyǵy mamandyǵyn meńgeretini habarlanǵan bolatyn.
