Qytaıda «Dolfın» taıfýnyna baılanysty júzdegen myń adam evakýatsııalandy
ASTANA. KAZINFORM — Qytaı bıligi eldiń shyǵys óńirlerinde «Dolfın» taıfýny saldarynan nóser jańbyr jaýyp, sý tasqyny qaýpi kúsheıýine baılanysty júzdegen myń adamdy qaýipsiz jerge kóshirdi, dep habarlaıdy Beıjińdegi Kazinform tilshisi Xinhua agenttigine silteme jasap.
Fýtszıan provıntsııasynda qurlyqtaǵy qaýipti aımaqtardan jáne teńizdegi nysandardan shamamen 167 900 adam evakýatsııalandy. Aldyńǵy kúni keshke Shanhaıda qaýip deńgeıi joǵary aýdandardan taǵy shamamen 215 600 turǵyn qaýipsiz jerge kóshirildi.
Tabıǵı apat kólik qatynasy men týrızm salasynyń jumysyna da kedergi keltirdi. Fýtszıan provıntsııasynda 686 qalaaralyq avtobýs baǵytynyń qozǵalysy, 658 poıyzdyń qatynaýy ýaqytsha toqtatyldy. Sonymen qatar 234 iri týrıstik nysan jabyldy.
Shanhaıdaǵy LEGOLAND Shanghai Resort taqyryptyq saıabaǵy dúısenbi kúni tústen keıin jumysyn ýaqytsha toqtatty. Aýdan ákimshiligi nóser jańbyr men qala aýmaqtaryn sý basý qaýpine baılanysty qaýiptiń eń joǵary deńgeıin jarııalady.
Buǵan deıin Qytaıda taıfýnǵa baılanysty júzdegen áýe reısiniń toqtatylǵany habarlanǵan bolatyn.
