Qytaıda «Dolfın» taıfýnyna baılanysty tabıǵı apat qaýpi kúsheıdi
ASTANA. KAZINFORM — Qytaıdyń Chjetszıan provıntsııasynyń bıligi «Dolfın» taıfýnynyń shyǵys jaǵalaýǵa jaqyndaýyna baılanysty tótenshe jaǵdaıǵa den qoıý deńgeıin IV-ten III deńgeıge deıin kóterdi, dep habarlaıdy Kazinform agenttiginiń Beıjińdegi menshikti tilshisi Xinhua agenttigine silteme jasap.
Qytaıdyń Ulttyq meteorologııalyq ortalyǵy «sary» qaýip deńgeıin jarııalady. Ortalyqtyń málimetinshe, taıfýn batysqa qaraı saǵatyna 15–20 shaqyrym jyldamdyqpen jyljyp keledi. Juma kúni tańerteń onyń epıtsentri Venlın qalasynan shyǵysqa qaraı 763 shaqyrym jerde bolǵan.
Sınoptıkterdiń boljamynsha, «Dolfın» taıfýny jeksenbi nemese dúısenbi kúni Qytaıdyń shyǵys jaǵalaýyna jetedi. Óńirdiń bas sınoptıgi Loý Sıaofen tabıǵı apat qaýpiniń joǵary ekenin eskertti.
Taıfýn qaýpine baılanysty óńirde parom qatynasy tolyq toqtatyldy. Teńizdegi 193 nysandaǵy jumystar ýaqytsha toqtatylyp, 474 qurylys kemesi porttarǵa qaıtaryldy. Teńiz qyzmetteri 24 myń kemeni tekserip, 86 myń eskertý habarlamasyn joldap, qutqarý býksırlerin joǵary daıyndyq rejımine kóshirdi.
Jergilikti bılikke qaýipti aımaqtardan turǵyndardy evakýatsııalaýdy bastap, azamattardyń ómiri men múlkin qorǵaý úshin jaǵdaıdy úzdiksiz baqylaýda ustaý tapsyryldy.
Buǵan deıin Qytaıda «Bavı» taıfýnynyń qurlyqqa shyqqany habarlanǵan bolatyn.
Aıta ketelik Qytaı Marstan ákelinetin topyraqty zertteıtin arnaıy zerthana turǵyzatyny týraly jazǵan edik.
