Qytaıda data-ortalyqtar 2030 jylǵa qaraı jalpy elektr energııasynyń 6%-yn tutynady

ASTANA. KAZINFORM — Qytaıdyń esepteý ınfraqurylymynyń energııa tutyný kólemi 2030 jylǵa qaraı 800 mıllıard kılovatt-saǵatqa jetpek, bul eldegi jalpy energııa tutynýdyń shamamen 6%-y, dep habarlaıdy Kazinform agenttiginiń Beıjińdegi menshikti tilshisi.
Bul týraly búgin Qytaıdyń Memlekettik energetıka basqarmasynyń (MEB) 2026 jyldyń alǵashqy úsh toqsanyndaǵy energetıka salasynyń damý nátıjelerine arnalǵan baspasóz máslıhatynda aıtyldy.

Qytaıda data-ortalyqtar 2030 jylǵa qaraı jalpy elektr energııasynyń 6%-yn tutynady
Foto: Berik Tabynbaev/Kazinform

— Jasandy ıntellekttiń qarqyndy damýyna baılanysty esepteý qýatyna degen suranys bolashaqta da óse beredi. 15-shi besjyldyq kezeńinde (2026–2030) esepteý qýatyn tutynýdyń jyldyq ósimi 100 mıllıard kılovatt-saǵattan asady, — dedi MEB Elektr energetıkasy departamenti basshysynyń orynbasary Tan Hýntszıan.

2025 jyly Qytaıdyń derek ortalyqtary shamamen 170 mıllıard kılovatt-saǵat tutyndy, bul eldiń jalpy elektr energııasyn tutyný kórsetkishiniń 1,6%-y edi.

Ósip kele jatqan suranysty qanaǵattandyrýdyń negizgi tetigi jaqyn mańdaǵy Kún jáne jel elektr stantsııalarynan derek ortalyqtaryna arnaıy jeliler arqyly «jasyl» energııany tikeleı jetkizý bolyp otyr.

Basqarmanyń málimetteri boıynsha, bıyl qyrkúıek aıynyń sońyna deıin 24 provıntsııaǵa osy shemany iske asyrý erejelerin tapsyryldy. El bıligi esepteý ınfraqurylymyna jańartylatyn energııany tikeleı jetkizý boıynsha 12 jobany maquldaǵan.
Vedomstvo bul model jasandy ıntellekt ındýstrııasynyń qajettilikterin qanaǵattandyryp, sonymen qatar jańartylatyn energııa kózderiniń tıimdiligin arttyratynyn atap ótti.

Buǵan deıin Qytaı ashyq teńizde álemdegi alǵashqy sý asty kún batareıalaryn synaqtan ótkizgen bolatyn.

Qytaıda jasandy ıntellekt óndiris pen eksporttyń ósýine yqpal etti.