Qytaıda COVID-19 vırýsy órshýi yqtımal

ASTANA. KAZINFORM - Qytaıda Aı kúntizbesi boıynsha Jańa jyl merekeleri kezinde COVID-19 vırýsyna shaldyǵý oqıǵalarynyń kóbeıýi boljanyp otyr.

Bul týraly brıfıng barysynda QHR Aýrýlardy baqylaý jáne aldyn alý jónindegi memlekettik basqarma ókili Leı Chjenlýn málimdedi, dep habarlaıdy Kazinform agenttiginiń tilshisi.

Onyń aıtýynsha, aldaǵy Kóktem merekesi (Chýntsze, Aı kúntizbesi boıysha jańa jyly) kezinde adamdardyń kóp júrýin eskere otyryp, koronavırýsqa shaldyqqandar sany artýy múmkin dep boljanýda.

Onyń aıtýynsha, 2023 jyldyń qysy bastalǵaly Qytaıda bir mezgilde birneshe patogen jáne jedel respıratorlyq aýrýlar jıiliginiń alma-kezek aınalymy baıqaldy.

Qazirgi ýaqytta elde tumaý epıdemııasy órship tur, al COVID-19 vırýsyna shaldyǵý kórsetkishi tómen. Bul rette koronavırýstyń XBB shtamy basym bolyp otyr. Degenmen, elde JN.1 shtamyn juqtyrý jaǵdaılarynyń kóbeıýi baıqalady.

Leı Chjenlýnniń atap ótýinshe, eldiń densaýlyq saqtaý organdary shekara beketterinde baqylaýdy kúsheıtip, halyqtyń osal toptaryn COVID-19-ǵa qarsy vaktsına egedi.

QHR Kólik mınıstrliginiń málimetinshe, «chýnıýn kezeńinde (qytaı halqynyń kóktemgi merekege deıingi, sonyń kezinde jáne odan keıingi maýsymdyq kóshi-qon ýaqyty) Qytaıda 9 mlrd sapar jasalady.

2024 jyly «chýnıýn» kezeńi 26 qańtarda bastalyp, 5 naýryzda aıaqtalady.

Qytaıdyń dástúrli Jańa jyly 10 aqpanda bastalady. Al Kóktem merekesi 10 aqpannan 17 aqpanǵa deıin jalǵasady.