Qytaıda chıkýngýnıaǵa arnalǵan ekspress-test ázirlendi

ASTANA. KAZINFORM – Qytaıda chıkýngýnıa qyzbasyn nebári 30 mınýtta anyqtaı alatyn jańa synaq jınaǵy jasaldy, dep habarlaıdy Kazinform China Daily basylymyna silteme jasap. 

Ázirleý jyldam sandyq polımerazdy tizbekti reaktsııa tehnologııasyna negizdelgen. Sarapshylardyń pikirinshe, PTR-nyń bul jetildirilgen túri kúsheıtý protsesi kezinde naqty ýaqyt rejıminde DNQ mólsherin ólsheýge múmkindik beredi. 

Jobada Gýanchjoý zerthanasy, Gýandýn provıntsııasynyń aýrýlardy baqylaý jáne aldyn alý ortalyǵy, Gýanchjoý segizinshi halyqtyq aýrýhanasy jáne birqatar bıomedıtsınalyq kompanııa jumys istedi. 

Testileý protsedýrasy endi jarty saǵatqa deıin sozylady, onyń 15 mınýty sarysýdy alýǵa jáne 12 mınýt kúsheıtýge jumsalady. Salystyrý úshin, buryn búkil protsess úsh-bes saǵatqa sozylatyn. 

Júıe Gýandýn provıntsııasynyń jetekshi medıtsınalyq mekemelerinde 1 myńǵa jýyq úlgilerde synalǵan jáne eń jaqsy kommertsııalyq reagenttermen salystyrýǵa bolatyn joǵary dáldik kórsetti. Zerthana synaqtyń jappaı qoldanýǵa daıyn ekenin jáne aýrýdyń aldyn alý men baqylaýda qosymsha qoldaý kórsetetinin aıtty. 

Aýrýdan qatty zardap shekken Foshanda jańa jaǵdaılardyń sany azaıyp, alty kún qatarynan 150-den tómen boldy. Jaǵdaıdyń jaqsarǵanyna qaramastan bılik turǵyndardy saqtyq sharalaryn saqtaýǵa shaqyrady. 

Eske sala keteıik, buǵan deıin habarlaǵanymyzdaı, Qytaı chıkýngýnıa vırýsyn juqtyrý qaýpi eń joǵary aımaqtar tizimin keńeıtti.