Qytaıda bıýrokratııamen kúresý úshin jańa reglament engizildi

Qytaıda memlekettik basqarýdyń tómengi deńgeılerindegi bıýrokratııalyq júktemeni azaıtýǵa baǵyttalǵan jańa erejeler jarııalandy, dep habarlaıdy Kazinform agenttiginiń menshikti tilshisi Sınhýa agenttigine silteme jasap.

QKP Ortalyq Komıteti men QHR Memlekettik keńesi daıyndaǵan qujatta jınalystar sanyn, qujat kólemin jáne jergilikti tekseristerdi azaıtý qarastyrylǵan. Sheneýnikterge qysqa, mazmundy materıaldar ázirleý jáne formalızmnen aýlaq bolý tapsyryldy.

Jańa reglamentke sáıkes, jyl saıyn shyǵarylatyn qujattardyń sany qysqarýy tıis. Ótken jylǵy lımıtten asqan vedomstvolar jazbasha túsinikteme berýge mindetti. Kóptegen qujattardyń kólemi 4–5 myń ıeroglıfpen shekteledi.

Aýqymdy jınalystar jylyna bir retten artyq ótkizilmeýi kerek, al vedomstvolyq kezdesýler múmkindiginshe biriktirilýi tıis. Basshylardyń baıandamalary bir saǵattan aspaýy tıis. Artyqshylyq aýdıo nemese beıne baılanys arqyly qashyqtan ótkizýge beriledi.

Erejede memlekettik qyzmet kórsetýge arnalǵan mobıldi qosymshalardy ázirleý men paıdalaný tártibi de naqty jazylǵan. Árbir vedomstvo tek bir qosymsha ǵana ıemdene alady, ol mindetti túrde kelisim rásiminen ótýi kerek. Mundaı qosymshalardy májbúrli túrde ornatýǵa nemese júıege kirý jıiligine qaraı qyzmetkerlerdiń jumysyn baǵalaýǵa tyıym salynady.

Sondaı-aq, qujatta jergilikti deńgeıdegi jumystyń tıimdiligi azamattardan kelip túsetin shaǵymdar sanyna ǵana qarap baǵalanbaýy tıis dep naqty aıtylǵan.

Buǵan deıin Qytaıda sheneýnikterge qymbat taǵam men alkogol paıdalanýǵa tyıym salynǵany týraly habarlanǵan bolatyn.