Qytaıda burynǵy sheneýnik $38 mln para alǵany úshin ólim jazasyna kesildi
ASTANA. KAZINFORM - Qytaı soty Nankın qalasy Halyq ókilderi jınalysy Turaqty komıtetiniń burynǵy tóraǵasy ári partııa komıtetiniń eks-hatshysy Lýn Sıandy paraqorlyq, qarjy jymqyrý, qyzmettik ókilettigin asyra paıdalaný jáne ınsaıderlik saýda jasaǵany úshin eki jylǵa keıinge qaldyrylǵan ólim jazasyna kesti, dep habarlaıdy Kazinform agenttiginiń Beıjińdegi menshikti tilshisi Xinhua agenttigine silteme jasap.
Hýbeı provıntsııasynyń Tszınchjoý qalasyndaǵy Orta halyq soty Lýn Sıandy ómir boıyna saıası quqyqtarynan aıyrý jáne barlyq jeke múlkin tárkileý týraly sheshim shyǵardy.
Qarjy jymqyrý, qyzmettik ókilettigin asyra paıdalaný jáne ınsaıderlik saýda boıynsha oǵan qosymsha bas bostandyǵynan aıyrý jazalary taǵaıyndaldy.
Sondaı-aq sot bul qylmystar úshin jalpy somasy 2 mln ıýan ($296 myń) aıyppul saldy.
2009-2025 jyldary Nankınniń partııalyq jáne baqylaý organdarynda joǵary laýazymdar atqarǵan Lýn Sıan kommertsııalyq qurylymdar men jeke tulǵalarǵa kelisimsharttar alýǵa jáne túrli máselelerin sheshýge kómekteskeni úshin 261 mln ıýannan ($38,6 mln) astam aqsha men baǵaly zattar alǵan.
Tergeý barysynda sheneýniktiń 2014-2016 jyldary Nankın ekonomıkalyq-tehnologııalyq damý aımaǵyn qoldaý qorynan 12 mln ıýan jymqyrǵany anyqtaldy.
Sonymen qatar ol tekserý kezinde zań buzǵan adamdardy jaýapkershilikten qorǵaǵan.
Lýn Sıan ınsaıderlik aqparatty paıdalanyp, 10 mln ıýannan astam somaǵa aktsııalarmen operatsııalar jasaǵan.
Sot Lýn Sıannyń kinásin moıyndaǵanyn, qarjy jymqyrý epızodtary boıynsha óz erkimen kelgenin, tergeýge kómekteskenin jáne zańsyz alǵan qarajatyn tolyq qaıtarǵanyn eskerdi.
Osy mán-jaılarǵa baılanysty sot ólim jazasyn oryndaýdy eki jylǵa keıinge qaldyrdy.
Qytaıdyń quqyqtyq tájirıbesinde ólim jazasyn oryndaýdy keıinge qaldyrý týraly úkim sottalǵan adam eki jyldyq synaq merziminde jańa qylmys jasamaǵan jaǵdaıda, ádette ómir boıyna bas bostandyǵynan aıyrý jazasyna aýystyrylady.
Keıin sottalǵan adamnyń tártibi úlgili bolǵan jaǵdaıda, jaza merzimi qysqartylýy múmkin.
Buǵan deıin Qytaıda Shanhaıdyń burynǵy sheneýnigi sybaılas jemqorlyq qylmysy úshin ólim jazasyna kesilgeni habarlanǵan bolatyn.
