Álem boıynsha bir jylda 100 mln-nan astam Labubu oıynshyǵy satylǵan

ASTANA. KAZINFORM - Qytaıdyń tanymal trend oıynshyqtar brendi Pop Mart kompanııasynyń Labubu oıynshyǵynyń satylymy ótken jyly 100 mıllıonnan asqan, dep habarlady Lianhe Zaobao.

Fengmian News pen Gonkongtaǵy Hong Kong Economic Journal basylymdarynyń habarlaýynsha, Pop Mart kompanııasy 7 aqpanda jyldyq jıynyn ótkizgen.

Іs-shara barysynda kompanııanyń negizin qalaýshy Van Nın 2025 jylǵy nátıjelerin jarııalady.

Onyń aıtýynsha, Labubu oıynshyǵynyń jyldyq satylymy 100 mıllıonnan asyp, al Pop Mart kompanııasynyń barlyq sanattar men IP ónimderiniń jıyntyq satylymy 400 mıllıonnan joǵary bolǵan.

Derekterge sáıkes, 2025 jyly Pop Mart kompanııasynyń álem boıynsha qyzmetkerler sany 10 myńnan asyp, tirkelgen paıdalanýshylarynyń jalpy sany 100 mıllıon adamǵa jetken.

Pop Mart búginde Qytaıdyń túpnusqa brendterin halyqaralyq naryqqa tabysty shyǵarǵan úlgili kompanııalardyń biri retinde baǵalanyp otyr.

Van Nınniń aıtýynsha, kompanııanyń bıznesi 100-den astam el men aımaqty qamtıdy, álem boıynsha 700-den astam dúkeni bar. Sonymen qatar Pop Mart alty iri óndiristik jáne logıstıkalyq bazaǵa ıe bolyp, 200 myńnan astam jumys ornynyń qurylýyna yqpal etken.

Aıta keteıik, Labubu — Gonkongtik POP MART kompanııasyna qarasty, sýretshi Kasing Lung oılap tapqan erekshe keıipker. Onyń usqynsyz ári súıkimdi beınesi, úlpildegen shashy men aıqaılap turǵandaı áser qaldyratyn bet álpeti jastardyń birden nazaryn aýdardy.

Ádettegi oıynshyqtardan ózgeshe, Labubu 2019 jyldan bastap Qytaı men Azııa naryǵyna «soqyr qorap» (blind box) úlgisimen shyqty.