Qytaıda «Boıdaqtar kúni» qarsańynda eki bólmeli páter nebári 11 ıýanǵa satyldy
ASTANA. KAZINFORM — Qytaı turǵyny «Boıdaqtar kúnine» arnalǵan jeńildikter naýqany kezinde Heılýntszıan provıntsııasynan eki bólmeli páterdi nebári 11 ıýanǵa (shamamen 750 teńge) satyp aldy, dep habarlaıdy South China Morning Post.
Saýdaǵa shyǵarylǵan páter turǵyn úıdiń jetinshi qabatynda ornalasqan, aýmaǵy 68 sharshy metr, eki bólmeli. Ol Alibaba Auction platformasynda satylymǵa qoıylǵan.
Páterdiń bastapqy baǵasy 1 ıýan bolyp belgilenip, árbir kelesi usynys 0,01 ıýanǵa kóterilip otyrǵan. Al satý baǵasy 11 ıýannan aspaýǵa tıis boldy. Platforma dereginshe, aýktsıonǵa 1,6 myńnan astam adam qatysqan.
Aýktsıonda Tszıansý–Chjetszıan óńirinen kelgen jasyryn satyp alýshy jeńiske jetti. Ol belgilengen eń joǵary baǵany alǵash bolyp usynǵan. Platforma málimetinshe, páterdiń aqshasy men komıssııalyq tólemder tolyq ótelgen.
Satyp alýshy aýktsıonnyń tikeleı efırinde jańa páterge kóshýdi josparlamaıtynyn aıtty. Ol baspanany qysta óńirge kelgende demalatyn oryn retinde paıdalanbaq. Alaıda páterdi óz atyna rásimdeý úshin qosymsha 2 myń ıýan (shamamen 135 myń teńge) jyljymaıtyn múlikti berý salyǵyn tóleýi kerek.
Jergilikti jyljymaıtyn múlik platformalarynyń málimetinshe, páterdiń naryqtyq baǵasy shamamen 40 myń ıýanǵa (2,7 mln teńge) baǵalanady.
Al páterdiń naryqtyq quny men satyp alýshy tólegen somanyń arasyndaǵy aıyrmany platformanyń ózi ótegen.
Zańgerler jyljymaıtyn múlikti tym arzan baǵaǵa satyp alý birqatar jasyryn qaterge uryndyrýy múmkin ekenin eskertti. Atap aıtqanda, menshik quqyǵyn rásimdeý kezinde qıyndyqtar týyndap, salyq pen basqa da tólemder boıynsha qaryzdar anyqtalýy múmkin. Sondaı-aq daý shyqqan jaǵdaıda sot shyǵyndaryna tap bolý qaýpi bar.
Buǵan deıin Germanııada XIII ǵasyrdaǵy qamal 1 eýroǵa satylymǵa shyǵarylǵany habarlanǵan bolatyn.
