Qytaıda bolashaq qalasynyń tujyrymdamasy tanystyryldy
ASTANA. KAZINFORM — Qytaıdyń Sıýnan jańa aýdanynda jerústi, jerasty jáne tsıfrlyq ınfraqurylymdy birtutas júıege biriktiretin «úsh qala» tujyrymdamasy tanystyryldy. Bul týraly Kazinform agenttiginiń Beıjińdegi menshikti tilshisi CGTN-ge silteme jasap habarlaıdy.
Qytaıdyń ınnovatsııalyq jobasy Hebeı provıntsııasynda ótken Jahandyq basqarý forýmynda tanystyryldy.
Sıýnannyń jerasty ınfraqurylymynyń negizin uzyndyǵy 106 shaqyrym bolatyn ınjenerlik tonnelder jelisi quraıdy. Ótken jyldyń sońyndaǵy jaǵdaı boıynsha bul júıe 1500 kúnnen astam ýaqyt boıy irkilissiz jumys istegen.
Spýtnıktik sıgnal jetpeıtin jerastynda baǵdarlaý úshin Sıýnanda «Beıdoý» spýtnıktik navıgatsııa júıesi men besinshi býyndaǵy uıaly baılanys tehnologııasyna negizdelgen ishki ornalasý júıesi iske qosylǵan.
Jerasty jelisi tutastaı alǵanda qalanyń «tsıfrlyq egizi» retinde jumys isteıdi. Ǵımarattardyń aqparattyq úlgileri men datchıkter sý qysymyn, temperatýrany, ylǵaldylyqty jáne gazdardyń shoǵyrlanýyn naqty ýaqyt rejıminde baqylap, málimetterdi biryńǵaı basqarý ortalyǵyna jiberip otyrady.
Bolashaq qalanyń jerasty tonnelderin tekserý úshin qytaılyq mamandar robottandyrylǵan kómekshilerdi paıdalanady.
– Buryn aýdandardyń birindegi uzyndyǵy 11,75 shaqyrym jerasty ýchaskesin eki maman tekserýge 22 saǵat isteıtin. Qazir bul jumysty bes tórt aıaqty robot úsh-tórt saǵatta oryndaıdy, – dedi ınjener Veı Tszyjen.
Beıjińnen ońtústik-batysqa qaraı shamamen 100 shaqyrym jerde ornalasqan Sıýnan aýdany Qytaı bıliginiń bastamasymen salynyp jatyr. Ol astananyń júktemesin azaıtýǵa arnalǵan, joǵary tehnologııalar qoldanylatyn ári ekologııalyq talaptarǵa saı óńirlik ortalyq bolmaq.
Buǵan deıin Qytaıda alǵash ret robot kómegimen júrek transplantatsııasy jasalǵan edi.
