Qytaıda bilim alǵysy keletin qazaq jastary úshin úkimettik grant sany artýy múmkin

ASTANA. KAZINFORM – Qazaqstanda ekinshi Lý Ban sheberhanasy ashylady. Bul týraly Qytaı Halyq Respýblıkasynyń Tóraǵasy Sı Tszınpınmen kelissózderden keıingi baspasózge arnalǵan málimdeme barysynda Memleket basshysy Qasym-Jomart Toqaev aıtty. 

«Biz ǵylym jáne bilim salasyndaǵy yntymaqtastyqty nyǵaıtyp kelemiz. Qazirgi tańda Qytaıdyń joǵary oqý oryndarynda 4 myńnan astam qazaq jastary bilim alyp jatyr. Qazaqstan tehnıkalyq mamandar daıarlaý máselesine basa mán beredi. Oǵan qytaıdaǵy áriptesterimiz qoldaý kórsetip otyr. Atalǵan saladaǵy yntymaqtastyqty odan ary damytýǵa kelistik. Qytaı Tóraǵasynyń sapary aıasynda eki tarıhı oqıǵanyń kýási boldyńyzdar. Birinshisi – Astana halyqaralyq ýnıversıtetiniń janynan Beıjiń til jáne mádenıet ýnıversıtetiniń fılıaly ashyldy. Sondaı-aq qurmetti Sı Tszınpın myrzamen Qazaqstanda ekinshi Lý Ban sheberhanasyn ashýǵa kelistik. Bul tıimdi ári mańyzdy joba elimizde joǵary kásibı mamandar daıarlaýǵa múmkindik beredi», - dedi Qasym-Jomart Toqaev.

Memleket basshysynyń atap ótýinshe, Qytaıdyń joǵary oqý oryndarynda bilim alǵysy keletin qazaq jastarynyń sany artty. 

«Bul turǵyda úkimettik grant sanyn kóbeıtý, Qazaqstan aýmaǵynda qytaıdyń ozyq tehnıkalyq ýnıversıtetteriniń fılıaldaryn ashý máselesine arnaıy toqtaldyq», - dedi Prezıdent.