Qytaıda «nómir birinshi sý tasqyny» tirkeldi
ASTANA. KAZINFORM — QHR Sý sharýashylyǵy mınıstrligi janyndaǵy Haıhe ózeniniń sý sharýashylyǵy isteri komıteti Lýanhe ózeninde dúısenbi kúni bolǵan tasqyn eldiń negizgi ózenderiniń arasynda 2025 jyly «nómir birinshi sý tasqyny» sanatyna jatqyzylǵanyn habarlady, dep habarlaıdy Sınhýa.
Tolassyz jaýǵan jańbyr Lýanhe ózenindegi sý deńgeıiniń kóterilýine sebep boldy. Vedomstvonyń málimetinshe, dúısenbi kúni saǵat 04:30–da Lýanhe ózeni negizgi aǵynyndaǵy Pantszıakoý sý qoımasyna quıylatyn sý sekýndyna 2270 tekshe metrge deıin kóterilgen.
Tıisti standarttarǵa sáıkes, dúısenbi kúni Lýanhe ózeninde tirkelgen sý tasqyny ózende jáne eldiń iri ózenderiniń arasynda 2025 jyly «nómir birinshi sý tasqyny» sanatyna jatqyzyldy.
Dúısenbi kúni keshke Pantszıakoý sý qoımasyna keletin sýdyń eń joǵary deńgeıi sekýndyna shamamen 4000 tekshe metrge jetedi dep kútilip otyr.
Haıhe ózeni basseıninde ornalasqan Beıjiń de sońǵy kúnderi qatty jaýǵan jańbyrdan zardap shekti, Qytaı astanasynyń Mııýn mańyndaǵy 3 myńnan astam turǵyn evakýatsııalandy.
Buǵan deıin Qytaıdyń 5 óńirinde sý tasqynyna baılanysty tótenshe áreket rejımi engizildi.