Qytaıda besjyldyq damý jospary talqylandy: JI-ǵa kóbirek kóńil bólindi

ASTANA. KAZINFORM — 20-23 qazan kúnderi Beıjińde Qytaı Kommýnıstik partııasy 20-shy shaqyrylǵan Ortalyq Komıtetiniń (QKP OK) eldiń áleýmettik-ekonomıkalyq damýynyń 15-shi besjyldyq josparyn (2026–2030) ázirleýge arnalǵan IV plenýmy ótip jatyr, dep habarlaıdy Sınhýa.

Basylym atap ótkendeı, jańa strategııalyq qujat turaqty ekonomıkalyq ósimniń basty kózine aınalýy tıis «jańa sapaly óndiristik kúshterdi» qalyptastyrý baǵytyna negizdelgen. Aldaǵy jyldary Qytaı ǵylymı-tehnıkalyq ınnovatsııaǵa, negizgi salalardy nyǵaıtýǵa, dástúrli ónerkásipterdi jańǵyrtýǵa basa nazar aýdarýdy kózdep otyr.

Joǵary tehnologııalyq sektorlardy damytýǵa jáne ǵylym men óndiristiń ıntegratsııasyn tereńdetýge erekshe nazar aýdarylatyn bolady. Tehnologııalyq ınnovatsııalardy yntalandyrýǵa, tutyný stsenarıılerin keńeıtýge jáne ǵylymı zertteýler tıimdiligin arttyrýǵa baǵyttalǵan «Jasandy ıntellekt plıýs» bastamasy osy salada basty ról atqarady.

Perspektıvaly salalarǵa «muz ben qar ekonomıkasy», «kúmis ekonomıka», «bıiktigi tómen ekonomıka», sondaı-aq aýyldyq tutyný naryǵy jatqyzylǵan. Bılik teńgerimdi aımaqtyq damytýdy, aýyldyq aımaqtardy jandandyrýdy jáne aýyl sharýashylyǵyn jańǵyrtýdy kózdep otyr.

2026-2030 jyldar aralyǵynda Qytaı QKP Ortalyq komıtetiniń aldyńǵy plenarlyq otyrystarynda maquldanǵan 300-den astam reformany júzege asyrýdy josparlap otyr. Jańa besjyldyq jospar 2035 jylǵa qaraı jan-jaqty sotsıalıstik jańǵyrtý maqsatyna jetý jolyndaǵy mańyzdy kezeń retinde qarastyrylady.

Buǵan deıin Qytaı tótenshe jaǵdaılar salasyna JI-di engizgenin jazǵan edik.