Qytaıda benzın men dızel otynynyń bólshek baǵasy tómendetiledi
ASTANA. KAZINFORM — Qytaıda 22 sáýirden bastap benzın men dızel otynynyń baǵasy tómendetiledi. Bul týraly QHR Memlekettik damý jáne reformalar komıteti málimdedi, dep habarlaıdy Kazinform agenttiginiń Beıjińdegi menshikti tilshisi.
Sońǵy ýaqytta álemdik munaı baǵasynyń ózgerýine baılanysty standartty sapadaǵy benzın men dızel otynynyń ishki baǵasy tıisinshe tonnasyna 555 ıýan ($81,6) jáne 530 ıýan ($77,9) kóleminde tómendeıdi.
CNPC, Sinopec, CNOOC korporatsııalaryna jáne basqa da munaı óńdeý kásiporyndaryna naryqty turaqty qamtamasyz etý úshin munaı ónimderin óndirý men tasymaldaýdy tıisti deńgeıde uıymdastyrý, sondaı-aq memlekettik baǵa saıasatyn qatań saqtaý tapsyryldy.
Óńirlerdegi beıindi vedomstvolarǵa belgilengen tarıfterdiń saqtalýyn kúsheıtip baqylaý, baǵa zańnamasyn buzýdyń kez kelgen túrin jedel toqtatý jáne naryqtaǵy tártipti qamtamasyz etý mindeti júkteldi.
Qytaıda qoldanystaǵy baǵa qalyptastyrý tetigine sáıkes, eger 10 jumys kúni ishinde álemdik munaı baǵasynyń ózgerýi munaı ónimderiniń tonnasyna 50 ıýannan astam aýytqýǵa ákelse, ishki janarmaı baǵasy qaıta qaralady.
Buǵan deıin Qytaı benzın men dızeldiń bólshek baǵasyn baqylaýdy jalǵastyratyny týraly jazǵan edik.