Qytaıda benzın men dızel baǵasy kóteriledi
ASTANA. KAZINFORM — Qytaı Halyq Respýblıkasynyń Memlekettik damý jáne reformalar komıteti juma kúni habarlaǵandaı, senbiden bastap Qytaıda benzın men dızel otynynyń bólshek baǵasy halyqaralyq munaı naryǵyndaǵy sońǵy ózgeristerge sáıkes kóteriledi, dep habarlaıdy Sınhýa.
Memlekettik damý jáne reformalar komıteti jarııalaǵan málimdemege sáıkes, benzın men dızel otynynyń baǵasy tıisinshe tonnasyna 320 ıýanǵa (shamamen 46,7 AQSh dollary) jáne 310 ıýanǵa ósedi.
21 sáýirde ishki naryqta munaı ónimderiniń baǵasy tómendetilgennen keıin halyqaralyq naryqta shıki munaı baǵasy qatty qubyldy. Vedomstvonyń málimetinshe, sońǵy túzetýge deıingi 10 jumys kúniniń ortasha baǵasy aldyńǵy túzetýden burynǵy 10 jumys kúniniń ortasha baǵasynan joǵary bolǵan.
Qytaıda munaı ónimderine arnalǵan baǵa belgileý mehanızmi bar jáne ol baǵany retteýdiń joǵarǵy shegin qarastyrady. Eger halyqaralyq munaı sebetiniń ortasha baǵasy barreline 130 AQSh dollarynan asyp ketse, bul shekten asqan bóligi boıynsha benzın men dızeldiń ishki bólshek baǵasy kóterilmeýi nemese óte shekteýli túrde kóterilýi múmkin.
Dýn Sıýchen aıtýynsha, jetkizilimniń turaqtylyǵyn qamtamasyz etý úshin memleket qosymsha qarjylyq jáne salyqtyq qoldaý sharalaryn da qabyldaýy múmkin.
Memlekettik damý jáne reformalar komıteti janyndaǵy baǵa monıtorıngi ortalyǵynyń sarapshylarynyń pikirinshe, qazirgi tańda halyqaralyq munaı baǵasyna áser etip otyrǵan negizgi faktor — AQSh pen Iran kelissózderi barysy bolyp otyr.
