Qytaıda benzın baǵasy ósip, kólik satylymy quldyrady
ASTANA. KAZINFORM — Qytaıda tamyz aıynda jeńil avtokólikterdiń bólshek saýdadaǵy satylymy jyldyq eseppen 23,6% tómendep, 1,541 mln birlik boldy. Bul týraly Qytaı avtomobıl dılerleri qaýymdastyǵynyń málimetine súıengen Kazinform agenttiginiń Beıjińdegi menshikti tilshisi habarlady.
Jyl basynan beri álemdegi eń iri avtokólik naryǵynda bólshek saýdadaǵy avtokólik satylymy byltyrǵy osy kezeńmen salystyrǵanda 20,8%-ǵa azaıyp, 11,716 mln kólikke jetti.
Eń úlken quldyraý ishten janý qozǵaltqyshy bar avtokólikter segmentinde tirkeldi. Olardyń satylymy 45%-ǵa tómendegen. Buǵan Ormýz buǵazyndaǵy jaǵdaıǵa baılanysty Qytaıda benzın baǵasynyń bir tonnasyna 1 720 ıýannan astamǵa, ıaǵnı shamamen 117 myń teńgege qymbattaýy áser etken.
Al tamyz aıynda avtokólik eksporty kerisinshe ósim kórsetti. Syrtqy naryqqa jóneltilgen kólikter sany 77,8%-ǵa artyp, 888 myń birlikke jetti. Onyń ishinde jergilikti brendterdiń eksporty 780 myń avtokólikti qurasa, birlesken kásiporyndar men premıým brendterdiń kórsetkishi 108 myń birlik boldy.
Eske salaıyq, buǵan deıin Qytaıdyń avtomobıl eksporty ekinshi aı qatarynan 1 mıllıonnan asqanyn jazǵan edik.
Qytaı avtomobıl óndirýshileri qaýymdastyǵy bas hatshysynyń orynbasary Chen Shıhýa ishki suranystyń álsizdigi kezinde eksport ósimniń negizgi qozǵaýshy kúshine jáne Qytaıdyń avtomobıl ónerkásibin turaqtandyrýdyń negizgi faktoryna aınalǵanyn atap ótti.
