Qytaıda balalar ýlanǵan balabaqsha dırektory ómir boıyna bas bostandyǵynan aıyryldy
ASTANA. KAZINFORM — Qytaıdyń Gansý provıntsııasynda sot balalar jappaı qorǵasynmen ýlanǵan balabaqshanyń basshysyn ómir boıyna bas bostandyǵynan aıyrdy, taǵy 5 qyzmetker túrli merzimderge jabyldy, dep habarlaıdy Kazinform agenttiginiń Beıjińdegi menshikti tilshisi Jenmın Jıbao basylymyna silteme jasap.
Lanchjoý qalasynyń orta deńgeıdegi halyq soty aıyptalýshylardy ýly jáne zııandy tamaq ónimderin óndirý jáne satý isi boıynsha kináli dep tapty ári olardyń qylmysyn aýyrlatatyn mán-jaılar anyqtaldy.
Sot qujattaryna sáıkes, balabaqsha basshylyǵy as úı qyzmetkerlerine balalar men qyzmetkerlerdiń tamaǵyna azyq-túlik emes ýly jáne zııandy zattardy qosýdy tikeleı tapsyrǵan, bul jábirlenýshilerdiń densaýlyǵyna aýyr zardabyn tıgizgen.
Tıanshýı qalasyndaǵy «Heshı Peısın» balabaqshasynyń is júzindegi dırektory Lı Hýeıfan saıası quqyqtarynan aıyryp, 500 000 ıýan (74 600 dollar) turatyn jeke múlkin tárkileı otyryp, ómir boıyna bas bostandyǵynan aıyrý jazasyna kesildi. Mekemeniń meńgerýshisi Chjý Tszınlın 15 jylǵa bas bostandyǵynan aıyrylyp, 300 000 ıýan (44 700 dollar) aıyppul salyndy.
As úıdiń taǵy tórt qyzmetkeri, Nıý Aııýan, Ven ıAfan, He Sıýısıa jáne An Chýnlın, alty jyldan segiz jylǵa deıin bas bostandyǵynan aıyrý jáne aıyppul tóleý jazasyna kesildi.
Buǵan deıin Qytaıdyń soltústik-batysyndaǵy Gansý provıntsııasyndaǵy balabaqshada 247 balanyń ýlanǵany týraly habarlanǵan. Balalardyń taǵamyna quramynda qorǵasyn bar ýly boıaýlardy ádeıi qosty degen kúdikpen alty adam, sonyń ishinde balabaqshanyń ınvestory, dırektory jáne aspazdary qamaýǵa alynǵan bolatyn.
