Qytaıda bakterııaǵa qarsy tok óndiretin tis şetkasy jasaldy
ASTANA. KAZINFORM - Beıjiń ýnıversıtetinde batareıasyz jumys isteıtin, tis tazalaý kezinde elektr qýatyn ózi óndiretin ári bakterııalardy joıatyn tis şetkasy jasaldy, dep habarlaıdy Kazinform agenttiginiń menshikti tilshisi jergilikti BAQ-qa silteme jasap.
Kádimgi tis şetkalary kirdi mehanıkalyq úıkelis arqyly ketirse, jańa qurylǵynyń qylshyqtary «aqyldy» plastıkten jasalǵan. Ol maıysqan kezde mıkrotok bólip, aýyz qýysyndaǵy sýmen árekettesý nátıjesinde bakterııaǵa qarsy qosylystar túzedi.
115 erikti qatysqan úsh aılyq klınıkalyq synaqta jańa tis şetkasy tis óńezin 40 paıyzǵa azaıtqan. Al kádimgi şetka qoldanǵan baqylaý tobynda bul kórsetkish 15 paıyz bolǵan. Sonymen qatar qyzyl ıektiń qabynýy da azaıǵan.
Ázirleýshiler ónimdi naryqqa shyǵarý úshin onyń tıimdiligine uzaq merzimdi baqylaý júrgizý qajet ekenin aıtady.
Buǵan deıin Qytaı ǵalymdary qandy qaterli isik jasýshalarynan tazartatyn qurylǵy jasaǵany habarlanǵan bolatyn.
