Qytaıda aıdahar qaıyqtarynyń merekesi atalyp ótti

ASTANA. KAZINFORM – Qytaı turǵyndary aı kúntizbesi boıynsha besinshi aıdyń besinshi kúnine sáıkes keletin "Dýaný" aıdahar qaıyqtarynyń merekesin atap ótedi. Meıram kúnderi (8-10 maýsym aralyǵy) QHR-dyń ondaǵan mıllıon azamaty el aımaqtaryna jáne shetelge týrıstik saparǵa shyǵady.

Meituan málimetterine súıensek, 1 maýsymdaǵy jaǵdaı boıynsha aıdahar qaıyqtary merekesi kezinde mádenı saıahatqa aldyn ala tapsyrys berý ótken jylmen salystyrǵanda shamamen 70%-ǵa ósken. Suranysqa ıe 10 baǵytqa Pekın, Sıan, Chendý, Ýhan, Chýntsın, Tsındao, Nankın, Chansha, Shanhaı jáne Chjenchjoý sııaqty qalalar enip otyr.

QHR kóshi-qon isteri jónindegi memlekettik basqarmasynyń baǵalaýy boıynsha, bıylǵy aıdahar qaıyqtary merekesi kezinde jolaýshylar aǵynynyń ortasha táýliktik sany 1,75 mln adamǵa jetedi dep kútilýde. Bul — ótken jyldyń osy kezeńimen salystyrǵanda 32,5%-ǵa artyq.

Osy mereke kúnderi iri halyqaralyq áýejaılarda da jolaýshylar aǵynynyń ósýi kútilýde. Olardyń qatarynda Pekın, Shanhaı, Gýanchjoý, Shenchjen, Chjýhaı áýejaılary bar.

Mereke qarsańynda jáne onyń barysynda temirjoldar boıynsha da jolaýshylar aǵynynyń artýy boljanyp otyr.

Juma, 7 maýsymda Qytaı temirjoldary shamamen 14,3 mıllıon jolaýshy tasymaldaǵan. 8 maýsymda jolaýshylar aǵyny 17 mıllıonǵa jetýi múmkin.

2023 jyly "Dýaný" merekesi kezinde 100 mıllıonnan astam sapar jasaldy, al týrıstik shyǵyndar 37,3 mıllıard ıýandy (shamamen 5 5,2 mıllıard) qurady.

Dástúr boıynsha, "Dýaný" merekesi aıdahar qaıyqtarymen jarysýmen jáne "tszýntszı" daıyndaýmen erekshelenedi.

Tszýntszı — bambýk japyraqtaryna oralǵan jáne pishini úshburyshqa uqsaıtyn ár túrli salmasy bar jabysqaq kúrishten jasalǵan táttiler.

Úsh kún ishinde Qytaıdyń qalalary men aýyldarynda qoıylymdar, halyq oıyndary men jármeńkeler ótedi dep josparlanyp otyr.