Qytaıda aıaq kıim fabrıkasyndaǵy órtten 28 adam qaza tapty
ASTANA. QazAqparat – Qytaıdyń Fýtszıan provıntsııasy Tsıýanchjoý qalasyna qarasty Tszıntszıan ýezdik qalasyndaǵy aıaq kıim fabrıkasynda bolǵan órt saldarynan 28 adam qaza tapty.
Qytaılyq BAQ-tardyń habarlaýynsha, oqıǵa 9 shilde kúni túski ýaqytta bolǵan. Órt Tszıntszıan qalasynyń Tszıantoý aýylynda ornalasqan «Hýeıten aıaq kıim óndirisi» kompanııasynyń ǵımaratynda shyqqan.
Tszıntszıan qalasynyń órt sóndirý-qutqarý qyzmetiniń málimetinshe, tótenshe jaǵdaı týraly habarlama saǵat 12:04-te túsken. Órt ornyna 183 qutqarýshy men 35 arnaıy tehnıka jiberilgen.
Oqıǵa ornynan taraǵan beınejazbalarda ǵımarattyń joǵarǵy bóliginen qoıý qara tútin shyǵyp, jalynnyń kúsheıgeni kórinedi.
Qutqarý jumystaryna tikushaqtar da tartylǵan. Jergilikti ýaqyt boıynsha saǵat 17:40 shamasynda órt negizinen sóndirilgen. Aldyn ala málimet boıynsha, órt ǵımarattyń birinshi qabatynan bastalǵan.
Qytaıdyń CCTV telearnasy órt saldarynan adam shyǵyny bolǵanyn rastady. Keıinirek jergilikti organdar apat qurbandarynyń sany 28-ge jetkenin habarlady.
Sınhýa agenttiginiń jazýynsha , Oqıǵadan keıin QHR Tóraǵasy Sı Tszınpın jaǵdaıǵa aıryqsha nazar aýdaryp, tıisti tapsyrmalar bergen. Ol zardap shekkenderdi izdeý-qutqarý jumystaryn barynsha tıimdi júrgizý, qaza tapqandardyń týystaryna kómek kórsetý, sondaı-aq apattyń sebepterin jedel anyqtap, jaýapty tulǵalardy zań aıasynda qatań jaýapkershilikke tartý qajettigin atap ótken.
Buǵan deıin Qytaıdyń ońtústigindegi Gýansı-Chjýan avtonomııalyq aýdanyndaǵy sý tasqynynan 39 adam qaza tapqany týraly habarlaǵan edik.
