Qytaıda aýyldy damytýǵa arnalǵan jańa qarjylyq mehanızm qurylady
ASTANA. KAZINFORM — Qytaı aýyl sharýashylyǵyn jańǵyrtýdy ilgeriletý úshin turaqty qarjylyq qoldaý tetigin iske qosady, dep habarlaıdy Sınhýa.
Senbi kúni Qytaı halyq banki jáne taǵy úsh memlekettik vedomstvo turaqty qarjylyq qoldaý tetigin qalyptastyrý jónindegi basshylyq qaǵıdattardy jarııalady. Bul bastama kedeılikke qaıta oralý qaýpiniń aldyn alýǵa jáne aýyldyq aýmaqtardy jan-jaqty jańǵyrtýǵa baǵyttalǵan.
Qujat Qytaıdyń qarjylyq retteý jónindegi memlekettik basqarmasy, Qytaıdyń baǵaly qaǵazdardy retteý komıteti jáne Qytaıdyń Aýyl sharýashylyǵy jáne aýyl isteri mınıstrligimen birlesip ázirlengen.
Qaǵıdattarda halyqtyń negizgi toptaryna baǵyttalǵan uzaqmerzimdi, damýǵa baǵdarlanǵan qarjylyq kómek tetigin jetildirý, sondaı-aq kedeılikten shyqqan adamdar men aýyldyq úı sharýashylyqtaryna arnalǵan mıkronesıeleý baǵdarlamalaryn ońtaılandyrý qarastyrylǵan. Bul sharalar aýyl turǵyndarynyń kedeılikke qaıta túsýiniń aldyn alý úshin turaqty qoldaý kórsetýge baǵyttalǵan.
Qujatta astyq pen taǵamdyq maı óndirisi salasyndaǵy qarjylyq qyzmetterdi jaqsartý úshin negizgi baǵyttarǵa qarjy resýrstaryn bólýdi kúsheıtý usynylady. Sonymen qatar, aýyl ınfraqurylymyn damytýǵa arnalǵan orta jáne uzaq merzimdi qarjylandyrýdy arttyrý arqyly aýyl sharýashylyǵy, mádenıet jáne týrızmniń yqpaldasqan damýyn qoldaý kózdelgen.
Basshylyq qaǵıdattarynda, ásirese damýy tómen óńirlerde, qarjy ınstıtýttaryn shaǵyn jáne mıkrokásiporyndar men aýyl sharýashylyǵyna baılanysty sektorlar úshin arnaıy oblıgatsııalar shyǵarýǵa yntalandyrý qajettigi de atap ótilgen.
Osydan buryn Qytaı 2030 jylǵa qaraı shaı ındýstrııasyn 1,5 trln ıýanǵa jetkizýdi kózdeıtinin jazǵan bolatynbyz.