Áýesqoı fýtbolshylar lıgasy Qytaıda týrızmge serpin berdi
ASTANA. KAZINFORM – Qytaıdyń soltústik-shyǵysyndaǵy «Dýnbeıchao» áýesqoılar fýtbol týrnıri ınternettegi úlken qubylysqa aınalyp, jelidegi qaralymdar men atalymdar sany 92,4 mıllıardqa jetti, dep habarlaıdy Kazinform agenttiginiń Beıjińdegi menshikti tilshisi.
11 qyrkúıekte Shenıanda ótken alǵashqy jartylaı fınaldyq kezdesýde jergilikti komanda Chanchýn qalasynyń klýbyn 1:0 esebimen jeńdi. Oıyndy trıbýnadan 41 myńnan astam kórermen tamashalady.
Týrnırdiń ereksheligi — oǵan qatysatyn 390 fýtbolshynyń basym bóligi kásibı sportshylar emes. Alańǵa stýdentter, sport áýesqoılary jáne túrli salada eńbek etetin azamattar shyǵady. Matchtardy barynsha qoljetimdi etý úshin uıymdastyrýshylar bılet baǵasyn 19,9 ıýan, ıaǵnı 3 dollarǵa belgiledi.
Resmı emes túrde «Qytaıdyń soltústik-shyǵysyndaǵy Sýperlıga» dep atalyp ketken týrnırdi Lıaonın, Tszılın, Heılýntszıan provıntsııalary men Іshki Mońǵolııa avtonomııalyq aýdany birlesip uıymdastyrdy. Oǵan Shenıan, Dalıan, Chanchýn, ıAnbıan, Harbın, Tszısı, Hýh-Hoto jáne Týnlıao qalalarynan segiz komanda qatysady.
23 mamyrda bastalǵan jarys ishki týrızmdi damytýǵa aıtarlyqtaı serpin berdi. Tórt óńir «Sýperlıgamen birge soltústik-shyǵysty arala» atty birlesken baǵdarlamany iske qosyp, sporttyq is-sharalardy mádenı baǵdarlamalarmen, saýda jáne qoǵamdyq tamaqtaný salalarymen ushtastyrdy.
Uıymdastyrýshylardyń málimetinshe, chempıonat ótip jatqan kezeńde Lıaonın provıntsııasyna ǵana 21 mıllıonnan astam týrıst barǵan. Tutyný salasyna tikeleı qosymsha áser 1,38 mıllıard ıýanǵa (205,7 mıllıon dollar) baǵalanyp otyr. Al sabaqtas salalarǵa tıgizgen jıyntyq ekonomıkalyq áser 9,26 mıllıard ıýanǵa (1,38 mıllıard dollar) jetti.
Buǵan deıin Qytaıda tsıfrlyq aktrısanyń tanymal bolyp kele jatqany habarlanǵan.
