Qytaıda ashylatyn qazaq mádenı ortalyǵynda qansha qyzmetker jumys istemek
ASTANA. KAZINFORM — Búgin Senattyń jalpy otyrysynda «Qazaqstan men Qytaı úkimeti arasynda ózara mádenı ortalyqtar qurý kelisimin ratıfıkatsııalaý týraly» zańy maquldandy.
«Qytaıda mádenı ortalyqtardy ózara qurý týraly sheshim qabyldanyp, 2023 jylǵy 27 qarashada Astana qalasynda Úkimetaralyq kelisim jasaldy. Zańnyń negizgi maqsaty — Beıjińde Qazaqstan Respýblıkasynyń, al Astanada Qytaı Halyq Respýblıkasynyń mádenı ortalyǵyn qurý. Ortalyqtardy qurý ózara qarym — qatynasty nyǵaıtýǵa, eki halyq arasyndaǵy ózara túsinistikti jan-jaqty qamtamasyz etýge, dostyq qarym-qatynastardy damytýǵa, memleketter arasyndaǵy mádenı-gýmanıtarlyq is-sharalar ótkizýge, eki eldiń tilin, mádenıetin, salt-dástúrlerin, tarıhyn tanystyrýǵa óz septigin tıgizetin bolady. Kelisimde mádenı ortalyq jiberýshi memleket akkredıttegen, sol eldiń zańnamasyna sáıkes jumys isteıtin kommertsııalyq emes uıym — zańdy tulǵa nysanynda jumys atqarady», — dedi senator Ǵalıasqar Sarybaev.
Onyń aıtýynsha, ortalyqtarǵa dinı, mıssıonerlik nemese sol memlekettiń zańnamasyna qaıshy keletin ózge de qyzmet júrgizýine, sol sııaqty jeke nemese zańdy tulǵalarǵa osyndaı qyzmetti júzege asyrýǵa járdemdesý ruqsat etilmeıdi.
Zańda mádenı ortalyqtardyń ornalasqan jerin anyqtaý, tabystary men múlkine salyq salý, basshysynyń mártebesi, taǵaıyndaý, daýlardy retteý tártibi, kelisim jasaý, ózgerister men tolyqtyrýlar engizý, zańdyq kúshine ený, uzartý merzimderi qarastyrylǵan.
«Qazir Qazaqstan Respýblıkasynyń Mádenıet jáne aqparat mınıstrligi qazaqstandyq mádenı ortalyq qyzmetiniń tujyrymdamasyn ázirledi. Tujyrymdamaǵa sáıkes, ortalyq ǵımaratynda túrli is-sharalar, kıno, kontserttik qoıylymdar ótkizýge arnalǵan kópfýnktsıonaldy zal, kýrstar, trenıngter, shyǵarmashylyq kezdesýler ótkizýge arnalǵan kovorıng oryndary bar kitaphana, kórmeler men tanystyrý is-sharalaryn uıymdastyrýǵa arnalǵan ekspozıtsııalyq alań men mýltımedııalyq keńistik, sondaı-aq týrızm buryshyn ornalastyrý kózdelgen. Beıjińdegi qazaqstandyq mádenı ortalyqtyń shtat sany 13 qyzmetkerden turady, onyń ishinde 3 qyzmetker — Qazaqstan azamattary, 10 qyzmetker — Qytaı tarapynan jaldanatyn azamattar bolady. Qytaıdaǵy Otanymyzdyń mádenıet ortalyǵy respýblıkalyq bıýdjetten qarjylandyrylady», — dedi depýtat.
Úkimet pen ýákiletti organnyń quzyretterin aıqyndaý maqsatynda «QR Mádenıet týraly» zańyna tıisti túzetýler men ózgerister engiziletin bolady.
«Kelisimdi ratıfıkatsııalaý eki el arasynda mádenı-gýmanıtarlyq, ǵylym men bilim berý baılanystaryn odan ári keńeıtýge, mádenıet jáne óner qaıratkerleriniń keń aýqymyn tartý arqyly týrıstik áleýetti damytýǵa, tarıhı-mádenı murasyn ilgeriletýge oń serpin beredi», — dedi senator.
