Qytaıda altyn buıymdarynyń baǵasy rekordtyq deńgeıge jetti

BEIJІŃ. KAZINFORM – Qytaıda altynnan jasalǵan zergerlik buıymdardyń baǵasy bir jylda 40,1% ósti. Buǵan Qytaıdyń Memlekettik statıstıka basqarmasynyń (MSB) dúısenbide jarııalanǵan málimetteri dálel, dep habarlaıdy Kazinform agenttiginiń menshikti tilshisi.

QHR MSB málimetinshe, 2025 jyldyń mamyr aıynda Qytaıda altyn buıymdary, úı toqyma buıymdary men oıyn-saýyq gadjetteriniń baǵasy bir jylmen salystyrǵanda sáıkesinshe 40,1%, 1,9% jáne 1,8% ósti.

Bıyl mamyr aıynda benzın qozǵaltqyshy bar avtokólikter men elektromobılder baǵasy sáıkesinshe 4,2% jáne 2,8% arzandady.

Bul rette 2025 jylǵy mamyrda qyzmet kórsetý baǵasynyń 0,5%-ǵa ósýi baıqaldy, bul ótken aımen salystyrǵanda 0,2 paıyzdyq tarmaqqa artyq.

Óndirýshiler baǵasynyń ındeksi (PPI) – taýarlar men qyzmet kórsetý óndirýshileri kóterme baǵalarynyń ózgerister kórsetkishi Qytaıda 2025 jyldyń mamyr aıynda bir jylmen salystyrǵanda 3,3% tómendedi.

Inflıatsııanyń negizgi kórsetkishi – tutyný baǵalarynyń ındeksi (SRІ) jyldyq esepteýde 0,1%-ǵa tómendegen.

Eske sala ketsek, QHR úkimeti bıyl tutyný baǵasy ındeksiniń ósimin 2 paıyz deńgeıinde ustap turýdy josparlap otyr. 2025 jyly Qytaı bıligi tutynýshylyq áleýetti arttyrýǵa, uzaq merzimdi taýarlarǵa suranysty turaqtandyrýǵa jáne qyzmet kórsetý salasyndaǵy tutynýdy keńeıtýge nazar aýdarmaq.

2024 jyldyń sońyna qaraı eldiń JІÓ 134,9 trln ıýan (18 trln dollardan astam) boldy.

Buǵan deıin frantsýz fermeri quny 4 mlrd eýro bolatyn altyn arqaýyn tapqanyn jazǵan bolatynbyz.