Qytaıda alǵash ret toǵyzqumalaqtan el birinshiligi bastaldy

ASTANA.KAZINFORM – Qytaıda toǵyzqumalaqtan alǵashqy el chempıonaty bastaldy.

Chinanews saıtynyń habarlaýynsha, dástúrli toǵyzqumalaq sportyn keńinen tanytýǵa baǵyttalǵan ashyq týrnır Shyńjań Uıǵyr avtonomııalyq ólkesi Morı Qazaq avtonomııalyq aýdanynda ótip jatyr.

Aıta keterligi, bul - toǵyzqumalaqtan óitp jatqan alǵashqy el chempıonaty. Úsh kúnge sozylatyn baıraqty básekege Beıjiń, Gansý, Tsınhaı jáne Іshki Mońǵol syndy 6 ólke-qaladan 60 adam qatysyp jatyr.

Іshki Mońǵol avtonomııaly ólkesinen kelgen qatysýshynyń aıtýynsha, osyndaı sharalar ár ulttar arasyndaǵy mádenı almasýdy ilgerletedi.

- Bul joly ártúrli provıntsııalar men qalalardan kelgen sheberlermen básekege túsýge múmkindigimiz bar. Toǵyzqumalaq tek oılaý synaǵy emes, sonymen qatar shahmat sheberligimen tájirıbe almasýǵa, sondaı-aq túrli ult ókilderiniń mádenı almasýyn ilgirletedi. Kóńil-kúıdi kóterip, eńbekqorlyqqa umtylýdyń sporttyq rýhyn kórsete alady,- dedi ol.

Osyǵan deıin habarlaǵanymyzdaı, Toǵyzqumalaq oıyny Qytaıda birshama tanymal. 2015 jyly Shyńjań-Uıǵyr avtonomııa ólkesinde Shahmat túrleri qoǵamyna qarasty toǵyzqumalaq sporty arnaıy komıteti quryldy. Bul qadam osy ınteltektýaldy oıynnyń Qytaıda damýyna aıtarlyqtaı serpin berdi. 

2016 jyly toǵyzqumalaq oıyny Úrimji qalalyq materıaldyq emes mádenı mura tizimine endi.

Al 2022 jyly Qytaıdyń úzdik ulttyq sport túri bolyp baǵalandy.