Qytaıda álemdegi eń bıik kópir ashyldy

ASTANA. KAZINFORM – Qytaıdyń ońtústik-batysyndaǵy Gýıchjoý provıntsııasynda ornalasqan álemdegi eń bıik kópir jeksenbi kúni tańerteń kólik qozǵalysy úshin ashyldy, dep habarlaıdy Kazinform Sınhýa agenttigine silteme jasap.

Kópir úsh jyldyq qurylystan keıin shatqal arqyly júrý ýaqytyn eki saǵattan eki mınýtqa deıin qysqartady. 

Gýıchjoý taýly aımaǵyndaǵy Beıpan ózeninen 625 metr bıiktikte ornalasqan Hýatszıan shatqaly kópiri San-Frantsıskodaǵy Altyn qaqpa kópirinen shamamen 9 ese bıik. 

Negizgi aralyǵy 1 420 metr bolatyn kópir taýly aımaqta salynǵan. 

«Jerdegi jaryqshaq» dep atalatyn Hýatszıan shatqalyn alyp jatqan uzyndyǵy 2 890 metrlik qurylym álemdegi ekinshi úlken ekonomıkanyń qarqyndy damyp kele jatqan ınfraqurylymdyq jelisiniń sońǵy býyny sanalady. 

Buryn álemdegi eń bıik dep sanalatyn Beıpan ózeni kópiri Hýatszıan shatqaly kópirinen sál ǵana 100 shaqyrym jerde ornalasqan. 2016 jyly kólik qozǵalysy úshin ashylǵan aldyńǵy rekordshy kópir palýbasy men ózen beti arasyndaǵy tik 565,4 metr qashyqtyqqa ıe boldy. 

Osy jyldar ishinde Qytaıdyń az damyǵan provıntsııalarynyń biri Gýıchjoý taýly aımaǵynda 30 myńnan astam kópir salyndy, onyń úsheýi álemdegi eń bıik dep eseptelinedi. Álemdegi eń bıik 100 kópirdiń jartysy osy Qytaı provıntsııasynda ornalasqan.

Eske sala keteıik, osyǵan deıin Qytaıda álemdegi eń bıik kópir ashylatynyn habarlaǵan edik.