Qytaıda áldebireýler 1 myńnan astam mysyqty etke ótkizbek bolǵan

Qytaı polıtsııasy qaıǵyly jaǵdaıǵa ushyraǵan myńnan astam mysyqty qutqaryp qaldy. Olardy soıyp, qoı jáne shoshqa eti retinde káýap pisirmek bolǵan. Kazinform agenttigi bul týraly VVS jańalyqtaryna silteme jasap habarlaıdy. 

Jergilikti BAQ-tyń habarlaýynsha, janýarlar quqyǵyn qorǵaýshylardyń nusqaýymen áreket etken polıtsııa shyǵystaǵy Chjantszıagan qalasynda mysyq tasymaldaǵan júk kóligin ustady.

Janýarlar arnaıy baspanaǵa jetkizildi, al polıtsııa mysyq etin (onyń bir kelisi – bir bir dollardaı) zańsyz satýdyń taǵy bir qylmystyq shemasyn ashty.

Bul Qytaıdaǵy azyq-túlik qaýipsizdigi máselesin taǵy da kún tártibine shyǵardy.

BAQ olardyń jabaıy mysyq nemese urlanǵan úı janýarlary ma - ol jaǵyn habarlaǵan joq.

Janýarlar eldiń ońtústigine aparylyp, onda eti shujyqqa nemese jalǵan shoshqa men qoı eti káýabyna paıdalanylýy múmkin. 

The Paper basylymynyń habarlaýynsha, Chjantszıagan qalasyndaǵy janýarlardy qorǵaý uıymynyń belsendileri jergilikti zıratta ishine kóp mysyq salynǵan aǵash jáshikter turǵanyn baıqaǵan. 

Belsendiler bul jerdi alty kún boıy baqylap, 12 qazanda mysyqtardy fýrgonǵa tıegen kezde joldy jaýyp, polıtsııa shaqyrǵan. 

Maýsym aıynda Qytaıdyń ońtústik-shyǵysyndaǵy Tszıansı provıntsııasyndaǵy kolledj stýdenti tárelkesinen egeýquıryqtyń basyn taýyp alǵan kezde janjal shyqty.

Bilim oshaǵynyń basshylyǵy alǵashynda bul úırek eti ekenin aıtqan, biraq keıin oqýshynyń sózi ras ekenin moıyndaýǵa májbúr boldy.