Qytaıda Ál-Farabı atyndaǵy Qazaq ulttyq ýnıversıtetiniń fılıaly ashylady
ASTANA.KAZINFORM — Ál-Farabı atyndaǵy Qazaq ulttyq ýnıversıtetiniń fılıaly Qytaıdyń Sýchjoý qalasynda ornalasqan Sýchjoý ýnıversıtetinde ashylady.
Tıisti kelisimge Qazaqstan-Qytaı joǵary tehnologııalyq kompanııalarynyń dóńgelek ústeli aıasynda qol jetkizildi.
Memorandýmǵa Ál-Farabı atyndaǵy QazUÝ-dyń Basqarma tóraǵasy — rektory Janseıit Túımebaev pen Sýchjoý ýnıversıtetiniń rektory Chjan Tsıao qol qoıdy. Jospar boıynsha alǵashqy oqý jylynda úsh bilim berý baǵdarlamasy boıynsha stýdentter qabyldanady. Atap aıtqanda, elektrotehnıka jáne jasandy ıntellekt baǵyttary boıynsha mamandar daıarlaý josparlanǵan. Ár bilim berý baǵdarlamasyna 100 stýdentten qabyldaý kózdelip otyr.
— Ál-Farabı atyndaǵy Qazaq ulttyq ýnıversıteti fılıalynyń Qytaıda ashylýy — biz úshin úlken tarıhı oqıǵa. Búginde Qytaı tarapynan ýnıversıtetimizge degen qyzyǵýshylyq artyp keledi. Qazirgi tańda QazUÝ-da 7 myńǵa jýyq sheteldik stýdent bilim alsa, olardyń 2 200-ge jýyǵy Qytaıdan kelgen jastar. Bul Qazaqstannyń joǵary bilim berý júıesine degen senim men qyzyǵýshylyqtyń jyldan jylǵa artyp kele jatqanyn kórsetedi, — dedi QazUÝ rektory Janseıit Túımebaev.
1900 jyly negizi qalanǵan Sýchjoý ýnıversıtetinde búginde 60 myńǵa jýyq stýdent bilim alady. Ýnıversıtet quramyndaǵy 37 fakýltette 5 myńnan astam professor-oqytýshy qyzmet etedi. Joǵary oqý orny QS Asia University Rankings reıtınginde 114-orynda tur. Sýchjoý ýnıversıteti Qytaıdaǵy zańgerlik bilim berý júıesiniń damýyna, joǵary bilikti magıstrler daıarlaýǵa jáne ǵylymı zertteýlerdi damytýǵa eleýli úles qosyp keledi.
