Qytaıda aqshany jylystatýǵa qarsy kúresti kúsheıtýge arnalǵan qujat qabyldandy
ASTANA. KAZINFORM – Qytaı bıligi aqshany jylystatýǵa qarsy arnaıy saqtyq sharalaryn retteıtin nusqaýlyq qujatty jarııalady. Bul týraly Qytaı Halyq banki málimdedi, dep habarlaıdy Sınhýa.
Atalǵan nusqaýlyq Qytaı Halyq banki men taǵy jeti memlekettik vedomstvonyń birlesip qabyldaýymen ázirlengen. Qujat aqshany jylystatý, terrorızmdi qarjylandyrý jáne jappaı qyryp-joıatyn qarýdy taratý áreketteriniń aldyn alýǵa, sondaı-aq osy saladaǵy arnaıy saqtyq sharalardy birizdendirýge baǵyttalǵan.
Nusqaýlyqqa sáıkes, barlyq uıymdar men jeke tulǵalar zań talaptaryna saı arnaıy sanatqa engizilgen sýbektilerge qatysty aqshany jylystatýǵa qarsy sharalardy mindetti túrde qoldanýy tıis. Bul sanatqa Memlekettik antıterrorıstik jumys jónindegi jetekshi top aıqyndaǵan jáne onyń keńsesi jarııalaǵan terrorıstik uıymdar men jekelegen tulǵalar jatady.
Sonymen qatar arnaıy sanatqa Qytaı Syrtqy ister mınıstrliginiń BUU Qaýipsizdik keńesiniń qararlaryn oryndaý týraly habarlamalarynda kórsetilgen nysanaly qarjylyq sanktsııalarǵa ilikken uıymdar men jeke tulǵalar da engizilgen.
Budan bólek, Qytaı Halyq banki nemese ózge de ýákiletti memlekettik organdar derbes ne birlesip aıqyndaǵan, aqshany jylystatý táýekeli joǵary dep tanylǵan jáne olarǵa qatysty shara qoldanbaý aýyr saldarǵa ákelýi múmkin sýbektiler osy tizimge kiredi.
Qujatta kózdelgen arnaıy saqtyq sharalaryna atalǵan sýbektilerge, olardyń agentterine, baqylaýyndaǵy uıymdar men tulǵalarǵa, sondaı-aq tikeleı nemese janama túrde ózderi baqylap otyrǵan qurylymdarǵa qarjylyq qyzmetter kórsetýdi, qarajat nemese aktıvter berýdi dereý toqtatý jáne tıisti qarajat pen aktıvterdiń qozǵalysyn shekteý sharalary kiredi.
Sondaı-aq nusqaýlyqta qarjy uıymdaryna aqshany jylystatýǵa qarsy arnaıy saqtyq sharalar boıynsha ishki baqylaý júıelerin qurý jáne jetildirý, sondaı-aq tıisti táýekelderdi anyqtap, baǵalaý tapsyrylǵan.
Aıta keteıik, Qytaı sheteldik oblıgatsııa ınvestorlary úshin salyq jeńildikterin uzartty.
