Qytaıda akkordeonda sınhrondy oınaýdan Gınnestiń jańa rekordy ornatyldy

ASTANA. KAZINFORM — Qytaıdyń soltústik-batysyndaǵy Sıntszıan-Uıǵyr avtonomııalyq aýdanynda, Tachen qalasynda jeksenbi kúni ótken mýzykalyq festıvalde akkordeonda bir mezette oınaýdan Gınnestiń jańa álemdik rekordy qoıyldy, dep habarlaıdy Sınhýa.

5 282 áýesqoı akkordeonshy — Qytaı, Reseı, Qazaqstan, Italııa jáne basqa elderden jınalǵan oryndaýshylar — «Meniń Otanym» ániniń áýenin birge oryndady.

Shara Tachendegi akkordeon mádenıetine arnalǵan V halyqaralyq festıval aıasynda uıymdastyryldy. Akkordeonǵa degen súıispenshilik túrli jastaǵy adamdardy biriktirdi: eń kishisi — 5 jasta, al úlkeni — 86 jasta.

Halyqaralyq akkordeonshylar konfederatsııasynyń prezıdenti Mırko Patarını bul jetistikti álemdik akkordeon mádenıetin damytýdaǵy jańa beles dep baǵalap, qatysýshylardy quttyqtady.

Qytaı kompozıtorlar men mýzykanttar odaǵyna qarasty akkordeonshylar qaýymdastyǵynyń jetekshisi Lı Tsýn bul oryndaýǵa dırıjerlik etti. Onyń aıtýynsha, akkordeon — Tachen qalasynyń mádenıetiniń nyshany jáne týrızmniń biregeı beınesine aınalǵan.

Sonymen qatar Tachende 1 000-nan astam túrli elderde (Qytaı, Reseı, Germanııa, Italııa jáne t. b.) jasalǵan akkordeon saqtalǵan erekshe murajaı da bar.

Budan buryn Azııa memleketteri arasynda alǵash uıymdastyrylǵan mýzykalyq baıqaý — «Silk Way Star» Astanada ótetini belgili boldy.