Qytaıda «áke men bala bólmeleri» tanymal bola bastady
ASTANA. KAZINFORM — Qytaıdyń iri megapolısterindegi qoǵamdyq oryndarda «áke men bala bólmeleri» nemese «balany kútýge arnalǵan otbasylyq bólmeler» paıda boldy, dep habarlaıdy Kazinform menshikti tilshisi Sınhýa. agenttigine silteme jasap.
Bul bastama sábıge kútim jasaıtyn ákelerdiń jaǵdaıyn jeńildetýge baǵyttalǵan.
Mundaı bólmelerdi búginde Beıjiń, Shanhaı jáne Shenchjen qalalaryndaǵy saýda ortalyqtary men ózge de qoǵamdyq oryndardan kezdestirýge bolady. Olar jórgek aýystyratyn ústeldermen, bótelke jylytqyshtarymen jáne sábılerge kútim jasaýǵa qajetti basqa da negizgi jabdyqtarmen qamtamasyz etilgen.
— Buryn balamen serýenge shyqqanda jórgek aýystyrý úshin dárethanadan ońasha oryn izdeýge týra keletin. Al qazir saýda ortalyqtarynda keń ári gıgıenalyq talaptarǵa saı «áke men bala bólmeleri» bar, bul ómirdi edáýir jeńildetti, — deıdi Beıjiń turǵyny Fan.
Uzaq ýaqyt boıy Qytaıda mundaı oryndar negizinen «ana men bala bólmeleri» formatynda ǵana bolǵan. Olar eń aldymen bala emizetin analardyń jeke keńistigin qorǵaý maqsatynda jasalyp, er adamdardyń kirýine shekteý qoıý qalypty jaǵdaı sanaldy.
Alaıda qoǵamdaǵy kózqarastardyń ózgerýine baılanysty ákelerdiń bala kútimine qatysýy aıtarlyqtaı artty. Bul ásirese 1990-jyldary týǵan mıllenıaldar arasynda baıqalady. Qazirgi tańda olar jas ata-analardyń negizgi bóligin qurap, otbasyndaǵy mindetterdi teń bólýdi jıi qoldaıdy.
Beıjiń ýnıversıtetiniń Áleýmettanýǵa qatysty zertteýler ınstıtýty júrgizgen qytaı otbasylarynyń jaǵdaıyn baqylaý jónindegi zertteý nátıjesine sáıkes, 10 jasqa deıingi balalary bar 1990-jyldary týǵan ákeler kúnine orta eseppen 2,39 saǵatty bala kútimine arnaıdy. Bul kórsetkish 1970 jyldan keıin týǵan ákelermen salystyrǵanda shamamen 16 paıyzǵa joǵary.
Qytaılyq respondentterdiń basym bóligi «áke men bala bólmeleriniń» nemese «balany kútýge arnalǵan otbasylyq bólmelerdiń» paıda bolýyn jaı ǵana ataýdyń ózgerýi dep sanamaıdy. Bul qytaı otbasylaryndaǵy bala tárbıesine qatysty túsinikterdiń tereń ózgerip jatqanyn aıqyn kórsetedi.
Osydan buryn Qytaı 2026 jylǵa qaraı búkil el boıynsha tegin bosanýdy qamtamasyz etýdi josparlap otyrǵanyn aıtqan edik.