Qytaıda 6G baılanysyna arnalǵan chıpterdiń jappaı óndirisi iske qosyldy
ASTANA. KAZINFORM – Qytaı bolashaqtaǵy 6G baılanys jelileriniń negizgi elementteriniń biri sanalatyn gallıı nıtrıdi negizindegi radıojıilikti chıpterdi jappaı jetkizýdi bastady, dep habarlaıdy AZERTADJ.
South China Morning Post basylymyna silteme jasaǵan agenttik málimetinshe, Qytaıda ıntellektýaldy termınaldar men baılanys júıelerine arnalǵan GaN-chıpterdiń iri serııaly óndirisi jolǵa qoıyldy.
Habarlanǵandaı, China Electronics Technology Group Corporation jáne onyń enshiles kompanııasy Nanjing Guobo Electronics ázirlegen shamamen 5 mıllıon jartylaı ótkizgish ónim shyǵarylǵan.
Mamandardyń aıtýynsha, gallıı nıtrıdi negizindegi komponentter radıojıilik traktilerindegi qýat kúsheıtkishterinde qoldanylady. Olar joǵary energııa tıimdiligin, keń jıilik dıapazonyn jáne turaqty jumysty qamtamasyz etedi. Bul qasıetter spýtnıktermen, áýe platformalarymen jáne jerústi ınfraqurylymymen baılanys ornatýda asa mańyzdy.
Sondaı-aq óndiristiń kremnıı negizindegi tósemderde uıymdastyrylǵany atap ótildi. Bul ónimniń ózindik qunyn tómendetip, óndiristi keń aýqymda damytýǵa múmkindik beredi.
Qytaılyq ázirleýshiler materıaldy ósirýden bastap synaqtan ótkizý men serııalyq óndiriske deıingi tolyq óndiristik tsıkldi qalyptastyrǵanyn málimdedi. Bul bolashaqta turaqty jetkizilimderdi qamtamasyz etýge múmkindik beredi.
Sarapshylardyń pikirinshe, gallıı tehnologııalyq básekelestiktegi strategııalyq mańyzdy resýrsqa aınalyp keledi. Al GaN-chıpter óndirisiniń ulǵaıýy Qytaıdyń spýtnıktik jeliler men bolashaqtaǵy 6G baılanys standarttaryn damytýdaǵy pozıtsııasyn kúsheıtedi.
Aıta keteıik, buǵan deıin qazaqstandyq jáne qytaılyq ǵalymdardyń shegirtkege qarsy ekologııalyq taza bıopreparatty sátti synaqtan ótkizgeni habarlanǵan bolatyn.
