Qytaıda 60 jastan asqan turǵyndar sany 323 mıllıonnan asty
ASTANA. KAZINFORM — 2025 jyldyń sońyndaǵy málimet boıynsha, Qytaıda 60 jastan asqan turǵyndar sany 323,38 mıllıon adamǵa jetip, el halqynyń 23 paıyzyn qurady. Bul týraly Kazinform agenttiginiń Beıjińdegi menshikti tilshisi China Daily basylymyna silteme jasap habarlady.
Bul derekter Qytaıdyń Azamattyq ister mınıstrligi men Qartaıý máseleleri jónindegi ulttyq komıteti ázirlegen 2025 jylǵy qarttarǵa kómek kórsetý júıesiniń damýy týraly ulttyq baıandamada keltirilgen.
Qujatqa sáıkes, 2025 jyldyń sońynda 65 jastan asqan turǵyndar sany 223,65 mıllıon adamǵa jetken. Bul el halqynyń 15,9 paıyzyn quraıdy. Sonymen qatar qarttarǵa qatysty demografııalyq júkteme koeffıtsıenti 23,1 paıyzǵa deıin ósken.
Bul kórsetkish eńbekke qabiletti árbir 100 azamatqa shamamen 23 qart adamnan keletinin bildiredi. Sonyń saldarynan Qytaıdyń áleýmettik qamsyzdandyrý jáne zeınetaqy júıesine túsetin júkteme artyp keledi.
Baıandamada sondaı-aq densaýlyq saqtaý júıesindegi jetistikterdiń arqasynda Qytaıdaǵy ortasha ómir súrý uzaqtyǵy 79,25 jasqa deıin artqany atap ótilgen.
Buǵan deıin Qytaı bıligi el turǵyndarynyń ortasha ómir súrý uzaqtyǵyn 80 jasqa deıin ulǵaıtýdy josparlap otyrǵany habarlanǵan bolatyn.
