Qytaıda $27,7 mln para alǵan eks-sheneýnik ólim jazasyna kesildi
ASTANA. KAZINFORM – Qytaıda burynǵy joǵary laýazymdy sheneýnik Lý Kehýaǵa ólim jazasy kesildi. Buryn Chýntsın partııa komıtetiniń saıası-quqyqtyq komıssııasynyń hatshysy qyzmetin atqarǵan eks-sheneýnikke úkim eki jylǵa keıinge qaldyrý shartymen shyǵaryldy. Bul týraly CCTV jazdy.
Sot málimetinshe, Lý Kehýa 1997 jyldan 2024 jylǵa deıingi aralyqta qyzmettik ókiletin júıeli túrde paıdalanyp, zańsyz tabys taýyp kelgen. Ol ár kezeńde mańyzdy laýazymdardy, sonyń ishinde Chýntsın qalasy ákiminiń orynbasary qyzmetin atqarǵan. Bul oǵan qyzmettik múmkindikterin asyra paıdalanýǵa jol ashqan.
– Sychýan provıntsııasyndaǵy Lýchjoý qalasynyń orta deńgeıli halyq soty úkimdi jarııa túrde oqydy. Sottalýshy asa iri kólemde para aldy dep tanyldy. Oǵan eki jylǵa shegerilgen ólim jazasymen qatar ómir boıyna saıası quqyqtarynan aıyrý jáne jeke múlkin tolyq tárkileý jazasy taǵaıyndaldy, – dep habarlady Qytaıdyń Ortalyq telearnasy — CCTV.
Habarlamada Lý Kehýanyń óz kinásin tolyq moıyndap, tergeýmen belsendi yntymaqtastyq ornatqany atap ótilgen. Dál osy jaǵdaı ólim jazasyn keıinge qaldyrýǵa negiz bolǵan. Qytaıdyń quqyqtyq júıesinde mundaı keıinge qaldyrý kóbine sottalýshy tártibin jaqsy ustasa, jazany ómir boıǵy túrme jazasyna aýystyrýǵa múmkindik beredi.
Sheneýniktiń zańsyz jolmen alǵan qarajatynyń jalpy kólemi 189 mıllıon ıýandy (shamamen 27,7 mıllıon AQSh dollary) quraǵan. Bul qarajattyń barlyǵy memleket kirisine tárkilenedi.
Lý Kehýa isi Qytaıdaǵy sybaılas jemqorlyqqa qarsy saıasattyń kúsheıip kele jatqanyn taǵy bir márte kórsetti. QHR tóraǵasy Sı Tszınpın 2026 jyldyń qańtarynda jemqorlyqpen kúres áli de kúrdeli ári shıelenisti kúıde qalyp otyrǵanyn málimdegen edi. Onyń aıtýynsha, «jemqorlyqtyń oshaqtary men oǵan jaǵdaı jasaıtyn faktorlardy» túbegeıli joıý áli qıyn bolyp otyr.
Buǵan deıin Qytaıdyń áskerı soty burynǵy qorǵanys mınıstrleri Veı Fenhe men Lı Shanfýne úkim shyǵarǵan. Eks-sheneýnikter para alý jáne para berý isi boıynsha kináli dep tanylyp, eki jylǵa keıinge qaldyrylǵan ólim jazasyna kesildi. Sonymen qatar Lı Shanfý men Veı Fenhe ómir boıyna saıası quqyqtarynan aıyrylyp, barlyq jeke múlki tárkilenedi. Eger eki jyldyq merzim ótken soń úkim oryndalmasa, jaza ómir boıǵy bas bostandyǵynan aıyrýmen almastyrylady. Bul rette merziminen buryn bosatý nemese jazany jeńildetý máselesi qarastyrylmaıdy.
