Qytaıda 247 bala qorǵasynnan ýlanǵan balabaqsha qyzmetkerleri qamaýǵa alyndy
ASTANA. KAZINFORM – Balabaqsha qyzmetkerleri qamaýǵa alyndy, is boıynsha tergeý jalǵasyp otyr, dep habarlaıdy Sınhýa aqparat agenttigi.
Qytaıdyń soltústik-batysyndaǵy Gansý provıntsııasynda balalar taǵamyna quramynda qorǵasyn bar ýly boıaýlardy ádeıi qosyp, mektep jasyna deıingi 247 balany ýlandyrǵan alty adam, sonyń ishinde balabaqshanyń ınvestory, dırektory jáne aspazdary qamaýǵa alyndy. Úkimettiń tergeý qorytyndylary jeksenbi kúni jarııalandy.
Gansý provıntsııasy bıliginiń ekologııa jáne densaýlyq saqtaý salasyndaǵy memlekettik sarapshylarynyń qatysýymen júrgizgen tergeý Tıanshýı qalasynyń Maıtszı aýdanyndaǵy «Heshı Peısın» balabaqshasynyń aspazdary shujyqsha salynǵan júgeri toqashtary men qurma qosylǵan tátti nandaryn jasaý úshin unǵa «jeýge jaramsyz» belgisi bar boıaǵyshtardy qosqan degen qorytyndyǵa keldi. Bul nan ónimderi balalar men qyzmetkerlerge 2024 jyldyń mamyr aıynan bastap aıyna birneshe ret berilgen.
Balabaqsha dırektory ınvestordyń maquldaýymen aspazshylarǵa taǵamnyń túrli tústi jáne tartymdy bolýyn keńes etti. Balabaqshadan alynǵan taǵam synamalarynyń zerthanalyq taldaýy qorǵasyn deńgeıiniń júgeri toqashtarynda 1,340 mg/kg jáne qurma qosylǵan tátti nandarynda 1,052 mg/kg joǵarylaǵanyn anyqtady, bul ruqsat etilgen normadan aıtarlyqtaı joǵary.
Synaq qorytyndysy boıynsha balabaqshadaǵy 251 balanyń 247-de qandaǵy qorǵasyn deńgeıiniń jalpy normadan aýytqýy bar, onyń ishinde 14 jaǵdaı qaıta testileý kezinde anyqtalǵan. Budan bólek, 28 qyzmetkerdiń qanynda qorǵasyn mólsheriniń joǵarylaǵany anyqtaldy.
Jeksenbi kúni tústen keıin barlyq 247 bala aýrýhanada emdeldi nemese úıde klınıkalyq tamaqtanýdan ótti. Barlyǵy 234 bala birinshi emdeý kýrsyn aıaqtap, aýrýhanadan shyǵaryldy, bir bala áli aýrýhanada jatyr. Balabaqshadan ótken jyly ketken bes balanyń da qandaǵy qorǵasyn deńgeıiniń normadan tys ekeni anyqtaldy, olar qazir úıde klınıkalyq tamaqtaný arqyly emdelip jatyr.
Mamandardyń qorytyndysyna sáıkes, medıtsınalyq kómek kórsetilgennen keıin naýqastardyń qanyndaǵy qorǵasyn deńgeıi 40,21%-ǵa tómendegen, bul emdik maqsatqa sáıkes keledi.
Quqyq qorǵaý organdary alty kúdiktini tutqyndady, onyń ekeýi tergeý oqshaýlaǵyshyna qamaldy, al úsheýi tergeýge deıin kepilmen bosatyldy. Іs boıynsha tergeý amaldary jalǵasyp jatyr.
Buǵan deıin Túrkistan oblysynda balabaqshadaǵy 24 bala taǵamnan ýlanǵanyn jazǵan bolatynbyz.