Qytaıda 2030 jylǵa qaraı 5G qosylymdary 1,7 mlrd-tan asady
ASTANA. KAZINFORM — Qazir Qytaıǵa álemdegi besinshi býyn baılanys jelisi — 5G qosylymdarynyń 40 paıyzdan astamy tıesili. Sarapshylardyń baǵalaýynsha, 2030 jylǵa qaraı eldegi 5G jelisine qosylýlar sany 1,7 mıllıardtan asady, dep habarlaıdy Sınhýa.
Bul týraly seısenbi kúni ashylǵan MWC Shanghai 2026 dúnıejúzilik mobıldi kongresinde jarııalanǵan «Qytaıdyń mobıldi ekonomıkasy – 2026» baıandamasynda aıtyldy.
Halyqaralyq uıaly baılanys operatorlary men jabdyq óndirýshileri qaýymdastyǵynyń (GSMA) esebine sáıkes, mundaı aýqym Qytaıdyń 5G tehnologııasyn qoldanýda ǵana emes, sonymen qatar ozyq mobıldi jelilerdiń damý baǵytyn aıqyndaýda da kóshbasshy ekenin kórsetedi.
Baıandamada atap ótilgendeı, 5G jelileriniń qamtý aýmaǵy men ótkizý qabileti keńeıgen saıyn saladaǵy basymdyq kóbirek paıdalanýshyny qosýdan joǵary ónimdi, ıntellektýaldy ári saralanǵan qyzmetterdi damytýǵa aýysyp keledi.
Bul úrdis Qytaıdyń materıktik bóligindegi 330-dan astam qalada 5G-Advanced tehnologııasyn kommertsııalyq negizde engizý arqyly kórinis taýyp otyr. Atalǵan tehnologııa mobıldi jasandy ıntellektini damytýǵa, ımmersıvti tutynýshylyq servısterdi keńinen qoldanýǵa, kásiporyndardyń tsıfrlyq transformatsııasyn jedeldetýge jáne qoǵamdyq ınfraqurylymdy nyǵaıtýǵa múmkindik beredi.
Qujatta kórsetilgendeı, 2025 jyly mobıldi tehnologııalar men qyzmetter Qytaıdyń jalpy ishki óniminiń shamamen 7,2 paıyzyn qamtamasyz etken. Bul shamamen 1,5 trıllıon AQSh dollaryna teń.
Sarapshylardyń boljamynsha, 2030 jylǵa qaraı bul kórsetkish 2,1 trıllıon AQSh dollaryna jetýi múmkin.
24-26 maýsym aralyǵynda ótip jatqan Shanhaıdaǵy dúnıejúzilik mobıldi kongress Azııadaǵy kommýnıkatsııa jáne tehnologııa salasyndaǵy eń iri ári yqpaldy is-sharalardyń biri sanalady. Forým barysynda álemniń jetekshi kompanııalary men jańashyl mamandary bolashaqtaǵy baılanys tehnologııalarynyń damý baǵyttary jóninde pikir almasady.
Buǵan deıin Qytaı 9 jyldan keıin alǵash ret sýperkompıýterlerdiń álemdik reıtınginde kósh bastaǵanyn jazǵan bolatynbyz.
