Qytaıda 2026 jylǵy kúndelikti jolaýshy tasymaly rekordtyq kórsetkishke jetti

ASTANA. KAZINFORM — Qytaıda 2026 jylǵy «chýnıýn» kezeńindegi kúndelikti jolaýshy qozǵalysy rekordtyq kórsetkishke jetti, dep habarlady Qytaı Halyq Respýblıkasynyń Kólik mınıstrligi. Bul týraly Sınhýa agenttigi jazdy.

Qytaıdaǵy «chýnıýn» kezeńinde bir kúndik aımaqaralyq jolaýshy tasymaly 20 aqpanda jańa tarıhı maksımýmǵa jetip, 350 mıllıon adam‑saıahattan asty. Bul kezeń halyqtyń Jańa jyl merekesi aldynda, mereke kezinde jáne odan keıingi aýqymdy ishki mıgratsııa kezinde eldiń transport júıesi erekshe rejimde jumys isteıtin ýaqyt sanalady.

Vedomstvo málimetinshe, 2026 jylǵy «chýnıýn» kezeńiniń 19‑shy kúni — 20 aqpanda aımaqaralyq jolaýshy aǵyny 352,999 mıllıon sapardy qurady. Bul kórsetkish 2025 jylǵy sáıkes kezeńmen salystyrǵanda 12,3%-ǵa artyq, ıaǵnı jańa rekord bolyp sanalady.

Kóktem merekesi, nemese Chýntsze, aı kúntizbesi boıynsha dástúrli qytaı Jańa jyly, bıyl 17 aqpanǵa tústi. Resmı merekelik demalys toǵyz kúnge sozylady. Jyl saıynǵy «chýnıýn» álemdegi eń iri maýsymdyq halyq mıgratsııasy retinde atalady. Aldaǵy 40 kúndik kezeńde, ıaǵnı 2 aqpannan 13 naýryzǵa deıin Qytaıda rekordtyq 9,5 mıllıard aımaqaralyq jolaýshy sapary tirkeledi dep kútilip otyr.

Aıta keteıik, buǵan deıin Kóktem merekesine oraı Qytaıda jolaýshylar sany 10,5%-ǵa artatynyn jazdyq.