Qytaıda 2026-2030 jyldarǵa arnalǵan ulttyq damý josparynyń jobasy usynyldy
ASTANA. KAZINFORM – Qytaı astanasynda «Eki sessııa» dep atalatyn eldiń joǵary keńesshi jáne zań shyǵarýshy organdarynyń jyl saıynǵy otyrystary bastaldy. Bıyl bul is-sharalardyń strategııalyq mańyzy zor, óıtkeni delegattar Qytaıdyń 2026-2030 jyldarǵa arnalǵan 15-shi besjyldyq damý josparyn bekitedi, dep habarlaıdy Kazinform agenttiginiń Beıjińdegi tilshisi.
Sársenbi, naýryzdyń 4-i kúni halyq májilisinde Qytaı Halyqtyq saıası konsýltatıvtik keńesiniń 14-shi ulttyq komıtetiniń 4-shi otyrysy ashyldy. Sessııa 11 naýryzǵa deıin jalǵasady. Ashylý saltanatyna QHR Tóraǵasy Sı Tszınpın, partııalyq jáne memlekettik organdardyń jetekshileri, dıplomatııalyq korpýs ókilderi qatysty.
QKHP ulttyq komıtetiniń tóraǵasy Van Hýnın óz baıandamasynda ótken kezeńdi qorytyndylap, Qytaıdyń 14-shi besjyldyqty sátti aıaqtaǵanyn atap ótti. Ol osy kezeńde Qytaı ekonomıkalyq qýaty, ǵylymı-tehnıkalyq áleýeti jáne qorǵanys qabileti boıynsha jańa kórsetkishterge qol jetkizgenin atap ótti.
Dál osy kúni Búkilqytaılyq halyq ókilderi jınalysynyń daıyndyq otyrysy ótti. Zań shyǵarýshy organnyń negizgi otyrysy 5-12 naýryz aralyǵyna josparlanǵan.
UKP sessııasynyń kún tártibinde úkimet jumysynyń esebin, 2026-2030 jyldarǵa arnalǵan ulttyq ekonomıkalyq jáne áleýmettik damýdyń 15-shi besjyldyq baǵdarlamasynyń josparynyń jobasyn, 2025 jylǵa deıingi ekonomıkalyq jáne áleýmettik damý josparynyń oryndalýy týraly esep, 2026 jylǵa arnalǵan jospardyń jobasyn jáne basqa da qujattardy qaraý bar.
«Eki sessııa» barysynda qabyldanǵan sheshimder ózgermeli jahandyq ahýal jaǵdaıynda Beıjińniń aldaǵy 5 jyldaǵy ekonomıkalyq baǵytyn anyqtaıdy. Jańa besjyldyq eldiń sandyq ósimnen joǵary tehnologııalar men ınnovatsııalarǵa negizdelgen sapaly damýǵa kóshýiniń sheshýshi kezeńi bolady dep kútilip otyr.
Eske sala ketsek, buǵan deıin Qytaıdyń «eki sessııa» otyrysy jáne onyń mańyzy týraly jazǵanbyz.
