Qytaıda 120 mln jyl burynǵy qaýyrsyndy dınozavrdyń jańa túri anyqtaldy
ASTANA. KAZINFORM — Qytaılyq paleontolog mamandar shamamen 120 mln jyl buryn ómir súrgen qaýyrsyndy dınozavrdyń jańa túrin sıpattady, dep habarlaıdy Xinhua.
Bul jańalyq dınozavrlardaǵy ushýdyń shyǵý tegin jáne qazirgi qustardyń evolıýtsııasyn zertteý úshin jańa derekter berip otyr.
Qytaıdyń soltústik-shyǵysyndaǵy Lıaonın provıntsııasynda erekshe jaqsy saqtalǵan qazba qaldyqtary tabyldy. Qańqada janýardyń búkil denesin derlik jaýyp turǵan qaýyrsyn izderi anyq saqtalǵan.
Zertteý qorytyndysy Vertebrata PalAsiatica jýrnalynda jarııalandy. Ǵalymdar anyqtalǵan dınozavrdyń qazirgi qustarmen tyǵyz baılanysty, úlken artqy aıaq qaýyrsyndary men erekshe uzyn, jelpýish tárizdi quıryq qaýyrsyndary bar pennataptorlar tobynyń jalǵyz belgili ókili ekenin anyqtady. Onyń quıryǵy shamamen 16 qaýyrsynnan turdy jáne syrtqy túri boıynsha taýys qusyna uqsaıtyn.
Jańa túr teropodtar tuqymdasyndaǵy dromeozavlarǵa jatqyzylǵan, oǵan velotsıraptor jáne mıkroraptor da kiredi. Zertteýshilerdiń aıtýynsha, aldyńǵy aıaqtary men arty aıaqtary jáne quıryqtarynda jaqsy damyǵan qaýyrsyndarmen úılesýi buryn anyqtalǵan birde bir belgili dınozavrda kezdespegen edi.
Ǵalymdar bul erekshelik dınozavrlarda ushýdyń qalaı damyǵanyn jáne qazirgi qustardyń qalaı paıda bolǵanyn túsinýdiń mańyzdy kilti dep sanaıdy.
Zertteý tobynyń jetekshisi, Qytaı Ǵylym akademııasynyń akademıgi Sıýı Sın jańa túrge Tszıansý provıntsııasyndaǵy Chanchjoý qalasynyń atymen Changzhousaurus sinensis ataýyn berdi. Qala paleontologııany belsendi túrde nasıhattaýymen jáne ǵylymı týrızmdi damytýymen tanymal.
Osyǵan deıin Argentınada buryn ǵylymǵa belgisiz bolǵan dınozavr túri anyqtalǵanyn jazdyq.
