Qytaıda 10,7 mlrd dollarǵa salynǵan jańa kanal iske qosyldy
ASTANA. KAZINFORM — Búgin Qytaıda eldiń ońtústik-batys óńirlerinen Ońtústik-Shyǵys Azııa elderine qysqa keme joly retinde salynǵan 134 shaqyrym «Pınlý» kanaly paıdalanýǵa berildi, dep habarlaıdy Kazinform agenttiginiń Beıjińdegi menshikti tilshisi Xinhua agenttigine silteme jasap.
Sý joly Gýansı-Chjýan avtonomııalyq aýdanynyń ákimshilik ortalyǵy Nannındi Beıbý shyǵanaǵymen baılanystyrady. Osylaısha Qytaıdyń ishki aımaqtary halyqaralyq keme joldaryna tikeleı qol jetkizip otyr.
Ashylý kúni porttan jańa baǵyt boıynsha Vetnam men Qytaıdyń Haınan aralyna alǵashqy júk kemeleri jolǵa shyqty.
— Jańa sý joly Qytaıdyń ońtústik-batysy men ASEAN elderi arasyndaǵy sý jolyn 560 shaqyrymǵa qysqartady, logıstıkalyq shyǵyndardy 18-30%-ǵa azaıtady, — dedi Guangxi Pinglu Canal Construction bas ınjeneri Pan Tszıan.
Sý yǵystyrymy 5000 tonnaǵa deıingi kemelerdiń júrýine arnalǵan kanaldyń qurylysy 2022 jyly bastalǵan. Jobaǵa jalpy 72,7 mıllıard ıýan (shamamen 10,75 mıllıard dollar) ınvestıtsııa salyndy.
Sarapshylardyń pikirinshe, Pınlý kanaly eldiń ońtústik-batysyndaǵy ózen jáne teńiz joldaryn Qytaı-Eýropa dáliziniń Eýrazııa qurlyǵymen ótetin bólikterimen biriktiredi, aımaqtyq yntymaqtastyq pen syrtqy saýda baılanystaryn nyǵaıtady.
Buǵan deıin Qytaıda júk kemesi órtenip, 25 adam qaza tapqanyn jazdyq.
