Qytaı júrgizýshisiz kólikterdiń qaýipsizdigine qatysty alǵashqy mindetti standarttardy bekitti
ASTANA. KAZINFORM — Qytaı avtonomdy basqarý fýnktsııalary bar kólikterge arnalǵan qaýipsizdiktiń alǵashqy mindetti ulttyq standarttaryn tanystyrdy. Jańa talaptar avtokólik óndirýshilerge qoıylatyn qaýipsizdik normalaryn kúsheıtedi, dep Kazinform agenttiginiń tilshisi China Daily basylymyna silteme jasap, habarlady.
Qytaıdyń Ónerkásip jáne aqparattyq tehnologııalar mınıstrligi jarııalaǵan jańa erejeler 2027 jylǵy 1 shildeden bastap kúshine enedi. Qujatqa sáıkes, L3 jáne L4 deńgeıindegi avtopılot júıesi bar kólikter keshendi qaýipsizdik júıeleri engizilmeıinshe, jol qozǵalysyna jiberilmeıdi.
Endi avtokólik óndirýshiler táýekelderdi basqarý júıesin engizip, avtonomdy fýnktsııalardy iske qospas buryn mindetti synaqtardan ótkizýge tıis. Onyń ishinde vırtýaldy modeldeý, arnaıy synaq alańdaryndaǵy tekserýler jáne naqty jol jaǵdaıyndaǵy synaqtar qarastyrylǵan.
Jańa talaptar avtopılot júıesi men júrgizýshi arasyndaǵy basqarýdy qaýipsiz berý tetikterine de qatysty kúsheıtildi. Sonymen qatar avtomobıl kompanııalary kóliktiń avtonomdylyq deńgeıin, júıeniń jumys isteý shekteýlerin jáne júrgizýshi men tehnologııa arasyndaǵy jaýapkershilik aımaǵyn nusqaýlyqtarda, resmı saıttarda jáne kólik ishindegi aqparattyq dıspleılerde naqty kórsetýge mindetteledi.
Aıta keteıik, buǵan deıin Astana, Almaty jáne Qosshyda júrgizýshisiz júretin kólikter synaqtan ótetinin jazdyq.
