Qytaı JOO-larynda grantpen oqýǵa qujattar qabyldaý merzimi uzardy
ASTANA. KAZINFORM – Úkimetaralyq kelisim aıasynda Qytaıdyń joǵary oqý oryndaryna oqýǵa arnalǵan memlekettik granttar boıynsha qujattardy qabyldaý merzimi 2026 jylǵy 18 aqpanǵa deıin uzartyldy.
Qazaqstan Respýblıkasynyń Bilim jáne ǵylym mınıstrligi men Qytaı Halyq Respýblıkasynyń Bilim mınıstrligi arasyndaǵy 2003 jylǵy 3 maýsymdaǵy bilim berý salasyndaǵy yntymaqtastyq týraly kelisimge sáıkes, Qytaı úkimeti 2026-2027 oqý jylyna QHR memlekettik stıpendııasy aıasynda oqýǵa 73 bilim grantyn usynady.
Qujattar 2026 jylǵy 18 aqpanǵa deıin «Elektrondyq úkimet» (Egov.kz) portaly nemese «Halyqaralyq baǵdarlamalar ortalyǵy» AQ arqyly qolma-qol qabyldanady.
Grant mynadaı shyǵyndardy óteıdi:
– tegin oqý;
– aı saıynǵy stıpendııa;
– medıtsınalyq saqtandyrý;
– jataqhanada turý.
Eskertý: ózge shyǵyndardy grant ıegeri ózi tóleıdi.
Konkýrstyq irikteýge qatysý úshin úmitkerler Qytaı stıpendııalyq keńesiniń saıtynda onlaın tirkeýden ótýi tıis.
2026 jyldan bastap Qytaı Halyq Respýblıkasynyń joǵary oqý oryndarynda bakalavr dárejesin alýǵa úmitker barlyq sheteldik talapkerler sheteldik stýdentterge arnalǵan akademııalyq daıyndyq testinen (CSCA) ótýge mindetti.
CSCA onlaın emtıhanyna tirkelý 2026 jylǵy 14 aqpan saǵat 12:00-ge deıin (Pekın ýaqyty boıynsha) júrgiziledi. Emtıhan 2026 jylǵy 15 naýryzda ótedi.
CSCA testileýi týraly tolyq aqparat myna siltemede ornalastyrylǵan.
Tolyq aqparat resmı saıtta jarııalanǵan.
Aıta keteıik, 2025 jyly Qazaqstanda 93 myń bilim granty bólindi.